ކޮވިޑް19 އާ ގުޅިގެން މިވަގުތު ރާއްޖޭގެ އިގްތިސޯދު އޮތް ހާލަތުން ބާޒާރުގައި ވިއްކާ ފިޔާ، އަލުވި، ރީނދޫ މުގު އަދި ބިހުގެ އަގު އިކޮނޮމިކް މިނިސްޓްރީން ކޮންޓްރޯލް ކޮށް، އަގުބޮޑުކޮށް ވިއްކާ ފަރާތްތައް ބޮޑު އަދަދަކުން ޖޫރިމަނާކުރަން ސަރުކާރުން ނިންމައިފިއެވެ.
އެ މިނިސްޓްރީން މިއަދު ބުނީ އަންނަ ހޯމަ ދުވަހުން ފެށިގެން މީހުން ދިރިއުޅޭ ރަށެއްގައި ފިޔާ އަދި އަލުވި ކިލޯއެއް ވިއްކޭނެ އެންމެ ބޮޑު އަގަކީ 20 ރުފިޔާ ކަމަށެވެ. ރީނދޫ މުގު ކިލޯއެއް އެންމެ ބޮޑުކޮށް ވިއްކޭނީ 45 ރުފިޔާ އަށެވެ. އަދި ބިހެއް ވިއްކޭނެ އެންމެ ބޮޑު އަގަކީ 1.80 ކަމަށެވެ.
އިކޮނޮމިކް މިނިސްޓްރީން ބުނީ އެއަށްވުރެ އަގުބޮޑުކޮށް އެތަކެތި ވިއްކާނަމަ ފުރަތަމަ ފަހަރަށް 100,000 ރުފިޔާ އިން ޖޫރިމަނާ ކުރާނެ ކަމަށެވެ. އަދި އެކަން ތަކުރާރުކުރާ ކޮންމެ ފަހަރަކު އެފަރާތެއް ގިނަވެގެން 100,000 ރުފިޔާއިން ޖޫރިމަނާކޮށް، އަދި ހަ މަސް ދުވަހަށްވުރެ ދިގުނޫން މުއްދަތަކަށް ވިޔަފާރިކުރާ ތަން ބަންދުކުރުމަށް އެންގުމުގެ ބާރު މިނިސްޓްރީއަށް ލިބިގެންވާ ކަމަށް އިކޮނޮމިކް މިނިސްޓްރީން ބުނެއެވެ.
ސަރުކާރުން މި ބާވަތްތަކުގެ އަގު ކޮންޓްރޯލް ކޮށްފައިވާއިރު މި ތަކެތީގެ އަގުތައް ބާޒާރުގައި އަންނަނީ ވަރަށް ބޮޑަށް އުފުލެމުންނެވެ.