(ޖުލައި 29، 2013 ވަނަ ދުވަހުގެ ބަޔާ ގުޅޭ)
ސަކީނާ ބޭނުންވީ ދޮގެއް ހަދައިގެން ނަމަވެސް ނާހިލް ސިޓިން ރޫމުގައި މަޑު ކުރުމަށެވެ.
"އާދޭ މަންމަގެ ބޯ މޮޑެދޭން. ނާހިލް ވަރަށް މޮޅެއްނު ދޯ" ސަކީނާގެ މޮޅު އަވާގައި ނާހިލް ޖެއްސި އެވެ.
މިއަދަކީ މާދިންގެ ހަޔާތުގައި ވަރަށް ލަދު ގަތް ދުވަހެކެވެ. މީހުންގެ ކުރިމަތީގައި މިހާރު މާދިންގެ އެއްވެސް އަގެއް ނެތް ކަން މާދިން ކަނޑައެޅި އެވެ.
އެހެން ނަމަވެސް މާދިންއަކީ ދުވަހަކު ވެސް އެއްވެސް މީހެއްގެ ހައްގަކަށް އެރި ކުއްޖެއް ނޫނެވެ. އެކަމަކު ނުކުރާ އެތައް ކަމެއް މިހާރު މާދިންގެ ބޮލުގައި އަޅުވައިފި އެވެ. ގޭތެރޭގައި ހިނގާ އެތައް ކަމެއް އެހެން ފަރާތްތަކަށް އިނގޭނެ އެއްވެސް ގޮތެއް މާދިންއަކަށް ނޭނގެއެވެ.
ހިލޭ މީހަކަށް އެގޭގައި އުޅެނީ ސާދާ އެވެ. ސާދާގެ ފަރާތުން މިކަހަލަ ކަމެއް ވެދާނެ ކަމަށް މާދިން އުއްމީދެއް ނުކުރެ އެވެ. މާދިންގެ މަންމަމެންނަށް ވުރެއް ސާދާ މާދިން އަށް އަޅާލަ އެވެ. ކަންކަމުގައި އެހީތެރިވެދީ ހަދައެވެ. މިކަމުގައި އާއިލާގެ ކޮންމެވެސް ފަރާތެއްގެ އަތެއްވާކަން މާދީން އަށް ވިސްނުނެވެ.
ޝާޔާ ގެއަށް ވަދެގެން ދިޔައީ ދުވެފަ އެވެ. އެއްވެސް މީހަކާއި ވާހަކަ ދައްކަން ޝާޔާ ބޭނުމެއް ނޫނެވެ. ކޮޓަރީގެ ދޮރު ތަޅުލުމަށް ފަހު އެނދުމައްޗަށް ވެއްޓިގަތެވެ. ގިސްލަ ގިސްލާފައި ރޯން ފެށި އެވެ. މުޅި ބާލީސް ވެސް ހީވަނީ ފެން އެއްޗެއް އޮއްސާލާފައިވާ އެއްޗެއް ހެންނެވެ.
ޝާޔާގެ އަތުގައިވާ މާދިންގެ ފޮޓޯ ވެސް ޝާޔާ ބޭނުންވީ ވީދާލާށެވެ. އެ ފޮޓޯއަކީ ސްކޫލުގައި ބޭއްވި ހަރަކާތެއްގައި ނަގާފައިވާ ފޮޓޯއެކެވެ.
އެ ދުވަހު އެފޮޓޯ ނެގީ ޝާޔާގެ އެދުމުގެ މަތިންނެވެ. ޝާޔާގެ އަތުގައިވާ ހަމައެކަނި މާދިންގެ ހަނދާނަކަށްވާ އެއްޗަކީ މާދިންގެ އެ ފޮޓޯގަނޑެވެ.
މާދިންގެ ހިޔާލުގައި ރޮން ޝާޔާ އޮތްވައި ސިއްސައިގެން ދިޔައީ ދޮރުގައި މީހަކު ޓަކި ޖަހައިލުމުންނެވެ. ފާހާނާ އަށް ވަދެ މޫނު ދެވޮގެން ގޮސް ދޮރު ހުޅުވައިލުމާއި އެކު ޝާޔާގެ ހިތަށް ބުނަން ނޭގޭ ފަދަ އިހްސާސެއްވި އެވެ.
(ނުނިމޭ)