މިހާރު ހިނގަމުން އަންނަ ލޯކަލް ކައުންސިލްތަކުގެ ދައުރު ހަމަވުމުން ރަށްރަށް ހިންގުމަށް ކައުންސިލަރުންތަކެއް އައްޔަން ކުރުމުގެ ބާރު ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހަށް ދިނުމުގެ ބަހުސް އެއް ރައްޔިތުންގެ މަޖިލީހުގައި ފަށައިފިއެވެ.
މިހާރު ހިނގަމުން އަންނަ ކައުންސިލްތަކުގެ ބަހުސް އަންނަ ޖޫން މަހުގެ ތިންވަނަ ދުވަހަށް ހަމަވާނެއެވެ. އެހެންކަމުން ސަރުކާރުން ވަނީ ގާނޫނުއަސާސީ އަށް އިސްލާހެއް ހުށަހަޅާފައެވެ. އެ އިސްލާހުގައި ބުނެފައިވަނީ އެ އިސްލާހު ފާސްވުމަށްފަހު ބާއްވާ ލޯކަލް ކައުންސިލް އިންތިހާބު ބާއްވާނީ ލޯކަލް ކައުންސިލް އެކުލެވޭ ގޮތް ކަމަށް އަދި އެ ކައުންސިލްތައް އިންތިހާބު ކުރަންޖެހޭ ގޮތް ކަމަށް ގާނޫނުއަސާސީގައި ބަޔާންކޮށްފައިވާ ގޮތުގެ މަތިން ކަމަށެވެ.
ލޯކަލް ކައުންސިލް އިންތިހާބު ބާއްވާ އެ ކައުންސިލްތަކަށް އަލަށް އިންތިހާބު ކުރެވޭ މެންބަރުން އެމީހުންގެ މަގާމާއި ހަވާލުވަންދެން ގާނޫނު އަސާސީއަށް ގެންނަ މި އިސްލާހަށް އަމަލު ކުރަން ފެށުމުގެ ކުރިން އިންތިހާބު ކޮށްފައިވާ އަދި މި އިސްލާހަށް އަމަލުކުރަން ފަށާއިރު މަގާމުގައި ދެމި ތިބި އަތޮޅު ކައުންސިލްތަކާއި ސިޓީ ކައުންސިލްތަކުގެ މެންބަރުން އެ މީހުންގެ މަގާމުގައި ދެމި ތިބޭނެ ކަމަށް ގާނޫނު އަސާސީއަށް ހުށަހަޅާފައިވާ އިސްލާހުގައިވެއެވެ.
ނަމަވެސް މި ދަނޑިވަޅަކީ ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާން ކޮށްފައިވާ ދަނޑިވަޅަކަށް ވާތީވެ ސަރުކާރަށް ތާއީދު ކުރާ ސަރުކާރުގެ މައިޕާޓީ އެމްޑީޕީގެ މެންބަރުން އަންނަނީ ގާނޫނުއަސާސީ އިސްލާހު އިސްލާހު ކުރުމާއި ދެކޮޅަށް ވާހަކަދައްކަވަމުންނެވެ. އެހެންނަމަވެސް ދައުލަތުގެ ބަންޑާރަ ނާއިބާއި ރައްޔިތުން މަޖިލީހުގެ ކައުންސެލާ ޖެނެރަލް ވެސް ވަނީ އެކަމުގައި ގާނޫނީ އެއްވެސް ހުރަހެއް ނެތް ކަމަށް ވިދާޅުވެފައެވެ.
ބައެއް މެންބަރުން މިއަދުގެ ޖަލްސާގައި ވާހަކަދައްކަވަމުން ވަނީ ޖޫން މަހުގެ ތިންވަނަ ދުވަހުން ފެށިގެން މިހާރު ތިއްބެވި ކައުންސިލަރުންނަކީ އިންތިހާބީ ބަޔަކަށް ނުވާނެ ކަމަށް ވިދާޅުވެފައެވެ. އެގޮތުން މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ ވަނީ މިހާރު ތިބި ކައުންސިލަރުންގެ ދައުރު ދަންމާލި ނަމަވެސް އެބޭފުޅުންގެ ދައުރު ހަމަވުމުން އެއީ އިންތިހާބީ ބަޔަކަށް ނުވާނެ ކަމަށް ވިދާޅުވެފައެވެ.
ބައެއް މެންބަރުން ވަނީ ކައުންސިލަރުންގެ ދައުރު ދަންމާލުމަކީ ޑިމޮކްރެޓިކް ގޮތެއް ނޫން ކަމަށް ވިދާޅުވެފައެވެ. އެގޮތުން ކަނޑިތީމު ދާއިރާގެ މެންބަރު އަބްދުﷲ ޝަހީމް ވަނީ މިހާރު ހިނގަމުން އަންނަ ކައުންސިލްތަކުގެ ދައުރު ހަމަވުމާއި އެކު ރައީސުލްޖުމްހޫރިއްޔާ އަށް ލިބޭ ބާރެއްގެ ދަށުން ކައުންސިލްތައް ހިންގުމަށް އައްޔަން ކުރުމަކީ ރަނގަޅު ކަމެއް ކަމަށް ވިދާޅުވެފައެވެ.
ގާނޫނުއަސާސީ އިސްލާހު ކުރުމަކީ އެމްޑީޕީގެ ބޮޑު އަގުލަބިއްޔަތެއް އޮތުމުން ވަރަށް ފަސޭހަ ކަމަކަށް ވެދާނެ ކަން ފާހަގަކުރައްވާ މިލަންދޫ ދާއިރާގެ މެންބަރު އަލީ ރިޒާ ވިދާޅުވީ ގާނޫނުއަސާސީ އިސްލާހު ކުރި ނަމަވެސް އެކަމުން ނިކުމެދާނެ ނަތީޖާ ފަހުން ގޯސްވެދާނެ ކަމަށެވެ. އަދި މިހާލަތުގައި ކަންކަން ކުރެވޭނެ ގޮތްތަކެއް ރައީސުލްޖުމްހޫރިއްޔާ އަށް ގާނޫނުއަސާސީން ދީފައިވާ ކަމަށް އޭނާ ވިދާޅުވިއެވެ. އެގޮތުން ރިޒާ ވަނީ ސިވިލް ސާވިސް މުވައްޒަފެއް ކައުންސިލްތަކުގެ ސެކްރެޓަރީ ޖެނެރަލް އެއްގެ ގޮތުގައި އައްޔަން ކުރުމަށް ހުށަހަޅާފައެވެ. ރިޒާގެ އި ހުށަހެޅުމަށް އެމްޑީޕީގެ ގިނަ މެންބަރުން ތާއީދު ވެސް ކުރެއްވިއެވެ.
މިއަހަރު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބު ނުބޭއްވުނީ ކޮވިޑް19 އާ ގުޅިގެން ރާއްޖޭގައި އިންތިހާބެއް ބޭއްވޭނެ ފަދަ ހާލަތެއް ނެތުމުންނެވެ.