މިހާރު ހިނގަމުން އަންނަ ލޯކަލް ކައުންސިލްތަކުގެ ދައުރު ހަމަވުމުން ރަށްރަށް ހިންގުމަށް ކައުންސިލަރުންތަކެއް އައްޔަން ކުރުމުގެ ބާރު ރައީސުލްޖުމްހޫރިއްޔާ އަށް ދިނުމަކީ ޑިމޮކްރެޓިކް އުސޫލުތަކާއި މުޅިން ހިލާފު ކަމެއް ކަމަށް މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ ޝަރީފް) ވިދާޅުވެއްޖެއެވެ.
ރައްޔިތުން މަޖިލީހުގެ މިއަދުގެ ޖަލްސާގައި އެމްޑީޕީގެ ބައެއް މެންބަރުން ވަނީ މިހާރު ހިނގަމުން އަންނަ ކައުންސިލަރުންގެ ދައުރު ހަމަވުމުން ކައުންސިލްތައް ހިންގުމަށް ރައީސުލްޖުމްހޫރިއްޔާ ބޭފުޅަކު އައްޔަން ކުރުމަށް ހުށަހަޅާފައެވެ.
މިލަންދޫ ދާއިރާގެ މެންބަރު އަލީ ރިޒާ ވިދާޅުވީ ގާނޫނުއަސާސީ އިސްލާހު ކުރި ނަމަވެސް އެކަމުން ނިކުމެދާނެ ނަތީޖާ ފަހުން ގޯސްވެދާނެ ކަމަށެވެ. އަދި މިހާލަތުގައި ކަންކަން ކުރެވޭނެ ގޮތްތަކެއް ރައީސުލްޖުމްހޫރިއްޔާ އަށް ގާނޫނުއަސާސީން ދީފައިވާ ކަމަށް އޭނާ ވިދާޅުވިއެވެ. އެގޮތުން ރިޒާ ވަނީ ސިވިލް ސާވިސް މުވައްޒަފެއް ކައުންސިލްތަކުގެ ސެކްރެޓަރީ ޖެނެރަލް އެއްގެ ގޮތުގައި އައްޔަން ކުރުމަށް ހުށަހަޅާފައެވެ. ރިޒާގެ އި ހުށަހެޅުމަށް އެމްޑީޕީގެ ގިނަ މެންބަރުން ތާއީދު ވެސް ކުރެއްވިއެވެ.
އެމްޑީޕީ މެންބަރުންގެ އެ ވާހަކަތަކަށް ނުރުހުން ފާޅު ކުރައްވާ މަޖިލީހުގައި ވާހަކަދައްކަވަމުން ޝަރީފް ވިދާޅުވީ ކައުންސިލަރުންގެ ދައުރު ހަމަވުމުން ރައީސުލްޖުމްހޫރިއްޔާ ނުވަތަ އެހެން މުއައްސަސާއަކުން ވެސް ބޭފުޅަކު އައްޔަން ކުރުމަކީ ގާނޫނުއަސާސީ ފުނޑާލުން ކަމަށެވެ. ރައްޔިތުންގެ މަޖިލީހުގައި ގިނަ ދުވަސްވީ މެންބަރުންގެ ތެރޭގައި ހިމެނިވަޑައިގަންނަވާ ޝަރީފް ވިދާޅުވީ ގާނޫނުއަސާސީގެ ރޫހަކީ ވެސް ވަކި ހާލަތެއް މެދުވެރިގެން އިންތިހާބު ނުބޭއްވިއްޖެ ނަމަ ކުރިން އިންތިހާބު ކުރި މެންބަރުންގެ ދައުރު ދަންމާލުން ކަމަށެވެ.
ޝަރީފް ވިދާޅުވީ ރައްޔިތުންގެ މަޖިލީހުގެ އިންތިހާބު ނުބޭއްވޭ ފަދަ ހާލަތެއް މެދުވެރިވެއްޖެ ނަމަމަޖިލީހަށް ހުށަހެޅޭ ގަރާރެއް ފާސްކޮށްގެން މަޖިލީހުގެ އިންތިހާބު އަހަރަކަށް ވުރެ ކުރު ނޫން މުއްދަތަކަށް ފަސްކޮށް މެންބަރުންގެ ދައުރު ފަސް ކުރެވޭ ކަމަށެވެ. އެހެންކަމުން އޭނާ ވަނީ އެގޮތަށް ކައުންސިލްތައް ވެސް ހިންގޭނެ ކަމަށް ފާހަގަކުރައްވާފައެވެ. އަދި ވިދާޅުވީ މިހާރު ހިނގަމުން އަންނަ ކައުންސިލްތަކުގެ ދައުރު ދިގު ނުކޮށް، އިންތިހާބު ނުކުރާ ބަޔަކު ކައުންސިލްތައް ހިންގުމަށް އައްޔަން ކުރުމަކީ އެންމެ ރަނގަޅު ވިސްނުން ނޫން ކަމަށެވެ.
ބައެއް މެންބަރުން މިއަދުގެ ޖަލްސާގައި ވާހަކަދައްކަވަމުން ވަނީ ޖޫން މަހުގެ ތިންވަނަ ދުވަހުން ފެށިގެން މިހާރު ތިއްބެވި ކައުންސިލަރުންނަކީ އިންތިހާބީ ބަޔަކަށް ނުވާނެ ކަމަށް ވިދާޅުވެފައެވެ. އެގޮތުން މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ ވަނީ މިހާރު ތިބި ކައުންސިލަރުންގެ ދައުރު ދަންމާލި ނަމަވެސް އެބޭފުޅުންގެ ދައުރު ހަމަވުމުން އެއީ އިންތިހާބީ ބަޔަކަށް ނުވާނެ ކަމަށް ވިދާޅުވެފައެވެ.
ބައެއް މެންބަރުން ވަނީ ކައުންސިލަރުންގެ ދައުރު ދަންމާލުމަކީ ޑިމޮކްރެޓިކް ގޮތެއް ނޫން ކަމަށް ވިދާޅުވެފައެވެ. އެގޮތުން ކަނޑިތީމު ދާއިރާގެ މެންބަރު އަބްދުﷲ ޝަހީމް ވަނީ މިހާރު ހިނގަމުން އަންނަ ކައުންސިލްތަކުގެ ދައުރު ހަމަވުމާއި އެކު ރައީސުލްޖުމްހޫރިއްޔާ އަށް ލިބޭ ބާރެއްގެ ދަށުން ކައުންސިލްތައް ހިންގުމަށް އައްޔަން ކުރުމަކީ ރަނގަޅު ކަމެއް ކަމަށް ވިދާޅުވެފައެވެ.
މިހާރު ހިނގަމުން އަންނަ ކައުންސިލްތަކުގެ ބަހުސް އަންނަ ޖޫން މަހުގެ ތިންވަނަ ދުވަހަށް ހަމަވާނެއެވެ. އެހެންކަމުން ސަރުކާރުން ވަނީ ގާނޫނުއަސާސީ އަށް އިސްލާހެއް ހުށަހަޅާފައެވެ. އެ އިސްލާހުގައި ބުނެފައިވަނީ އެ އިސްލާހު ފާސްވުމަށްފަހު ބާއްވާ ލޯކަލް ކައުންސިލް އިންތިހާބު ބާއްވާނީ ލޯކަލް ކައުންސިލް އެކުލެވޭ ގޮތް ކަމަށް އަދި އެ ކައުންސިލްތައް އިންތިހާބު ކުރަންޖެހޭ ގޮތް ކަމަށް ގާނޫނުއަސާސީގައި ބަޔާންކޮށްފައިވާ ގޮތުގެ މަތިން ކަމަށެވެ.
ލޯކަލް ކައުންސިލް އިންތިހާބު ބާއްވާ އެ ކައުންސިލްތަކަށް އަލަށް އިންތިހާބު ކުރެވޭ މެންބަރުން އެމީހުންގެ މަގާމާއި ހަވާލުވަންދެން ގާނޫނު އަސާސީއަށް ގެންނަ މި އިސްލާހަށް އަމަލު ކުރަން ފެށުމުގެ ކުރިން އިންތިހާބު ކޮށްފައިވާ އަދި މި އިސްލާހަށް އަމަލުކުރަން ފަށާއިރު މަގާމުގައި ދެމި ތިބި އަތޮޅު ކައުންސިލްތަކާއި ސިޓީ ކައުންސިލްތަކުގެ މެންބަރުން އެ މީހުންގެ މަގާމުގައި ދެމި ތިބޭނެ ކަމަށް ގާނޫނު އަސާސީއަށް ހުށަހަޅާފައިވާ އިސްލާހުގައިވެއެވެ.