މުޅި ދުނިޔޭގައި ހަލުވި ކަމާއެކު ފެތުރެމުންދާ ކޯވިޑް-19 އެންމެ ފުރަތަމަ ފެތުރެން ފެށި ޗައިނާގެ ވޫހާން ސިޓީ 76 ދުވަހުގެ ލޮކްޑައުން އަކަށްފަހު މިއަދު ހުޅުވައިފިއެވެ. އެގޮތުން ހައިވޭ، ރޭލު އަދި ވައިގެ މަގުން ވޫހާންގައި ތިބި ސިއްޙީ ހާލަތު ރަނގަޅު މީހުންނަށް ވޫހާން ދޫކޮށް އެހެން ހިސާބުތަކަށް ދިޔުމުގެ ފުރުސަތު މިއަދު ހުޅުވާލެވޭނެއެވެ.
ޗައިނާއިން ވޫހާން ހުޅުވާލަން ނިންމާފައިވަނީ އެޤައުމުގެ ތެރެއިން ގާތްގަނޑަކަށް އެއްވެސް އާ ކޯވިޑް-19ގެ ކޭސްއެއް ފާއިތުވި ހަފްތާތަކުގެ ތެރޭގައި ރިޕޯޓުކުރެވިފައިނުވާތީއެވެ. އެގޮތުން ފާއިތުވި މަހުގެ ތެރޭގައި ހޫބެއި ޕްރޮވިންސްގެ އެކި ހިސާބުތަށް ވަނީ ލޮކްޑައުންގެ ހާލަތުން ނަގާފައެވެ.
ނަމަވެސް އިދާރާތަކުން ބުނާގޮތުގައި ކޯވިޑް-19 ފެތުރެން ފެށުމުން އެ ސިޓީ ވެއްޓުނު ސިއްޙީ ހާލަތުން އަރައިގަނެވުމާއެކު ސިޓީ ހުޅުވާލެވުނު ނަމަވެސް، އަދިވެސް ބަލި ފެތުރުމުގެ ފުރުސަތު އޮތުމާއެކު، ވޫހާން ތެރޭގައި ދަތުރުފަތުރުކޮށް އުޅުމަށް އަޅާފައިވާ ބައެއް ހުރަސްތަށް އަދިވެސް ދެމި އޮންނާނެއެވެ.
އަދި މިހުޅުވާލުމާއި ގުޅިގެން ވޫހާންގައި އިޤްތިޞާދީ އަދި އިޖުތިމާއީ ހަރަކާތްތަށް އަލުން ފެށުނު ނަމަވެސް އެ ސިޓީއަށް ބޭރުން ކޯވިޑް އަލުން އައުން ހުއްޓުވުމާއި، ސިޓީތެރޭގައި އަލުން ބަލި ފެތުރުން ކޮންޓްރޯލް ކުރުމަށް ބޮޑެތި މަސައްކަތްތަކެއް ކުރަން ޖެހޭނެކަމަށް އެ ސިޓީގެ އެޕިޑެމިކް ކޮންޓްރޯލް އޮފިޝަލުން ލަފާކުރެއެވެ.
11 މިލިއަން މީހުން ދިރިއުޅޭ ވޫހާންގައި ކޯވިޑް-19 ފެތުރެންފެށީ 2019 ވަނަ އަހަރުގެ ޑިސެމްބަރ މަހުގެ ތެރޭގައެވެ. އަދި އެސިޓީ ލޮކްޑައުން ކޮށްފައިވަނީ މިއަހަރުގެ ޖަނަވަރީ މަހުގެ 23 ވަނަ ދުވަހުގައެވެ.