ކޯވިޑް-19 ޖެހިގެން އަންގާރަ ދުވަހު އެކަނިވެސް އެމެރިކާގައި 1736 މަރުވެއްޖެއެވެ. މިއީ މިހާތަނަށް އެއް ދުވަސް ތެރޭގައި އެޤައުމުން މި ބަލީގައި މީހުން އެންމެ ގިނައިން މަރުވި ދުވަހެވެ.
ޖޮންސް ހޮޕްކިންސް ޔުނިވަރސިޓީގެ ތަފާސް ހިސާބުތަކުން ދައްކާގޮތުގައި މި އަދަދާއެކު މިހާރު އެމެރިކާގައި ކޯވިޑް-19 ޖެހިގެން ޖުމްލަ 12،722 މީހުން މަރުވެ 398،000 އަށް ވުރެ ގިނަމީހުން ވަނީ ބައްޔަށް ޕޮޒިޓިވް ވެފައެވެ. އެމެރިކާއަކީ މުޅި ދުނިޔެއިންވެސް އެންމެ ގިނައިން މިބަލި ޖެހިފައިވާކަމަށް ރިޕޯޓު ކުރެވިފައިވާ ޤައުމު ނަމަވެސް، އެޤައުމުގެ ރައީސް ޑޮނަލްޑް ޓްރަމްޕް ބުނާ ގޮތުގައި އެޤައުމުގެ ހާލަތުދަނީ ކޮންޓްރޯލް ކުރެވެމުންނެވެ.
މީގެ ކުރިން އެމެރިކާގައި 24 ގަޑިއިރު ތެރޭގައި ކޯވިޑް-19 ޖެހިގެން އެންމެ ގިނަ މީހުން މަރުވެފައިވަނީ އޭޕްރިލް 4 ގައެވެ. އެދުވަހު އެޤައުމުން 1344 މީހުން މަރުވެފައިވެއެވެ.
ބެލެވޭ ގޮތުގައި އެ ޤައުމުގެ އިތުރު ސްޓޭޓް ތަކުން މަރުގެ އަދަދުތަށް ހަމަ ކުރަމުން ދާ ވަރަކަށް އަންގާރަ ދުވަހު ކޯވިޑް-19 ޖެހިގެން މަރުވި މީހުންގެ އަދަދު އިތުރުވުން އެކަށީގެންވެއެވެ.