ހދ. ކުޅުދުއްފުށީ ސިޓީގައި ބިދޭސީއަކަށް ހަމަލާދީ އެމީހާގެ ވޮލެޓު ފޭރުގެންފިއެވެ.
ފުލުހުން މިއަދު ބުނީ ރޭ 22:30 އެހާކަށްހާއިރު މޫނި ނިވާ ކޮށްގެން ތިބި ބަޔަކު ކުޅުދުއްފުށީގެ މަގެއްގެ މަތިން ހިނގާފައި ދިޔަ ބަންގްލަދޭޝަން ފިރިހެނެއްގެ ގައިގައި ދަނޑިބުރިއަކުން ޖަހާ މާރާމާރީ ހިންގާ އެމީހާގެ ވޮލެޓު ފޭރިގެންފައިވާ މައްސަލަ އެއް ހުށަހަޅާފައިވާ ކަމަށެވެ.
ފުލުހުން ބުނީ އަނިޔާ ލިބުނު ފަރާތުންގެ ވާތު ބުމަ މަތިން އެއް އިންޗި ހުންނަވަރުގެ ތަނަށް ފަޅައިގެން ގޮސްފައިވާ ކަމަށެވެ. އަދި އެމީހާއަށް ކުޅުދުއްފުށި ހޮސްޕިޓަލަށް ގެންގޮސް ފަރުވާ ދީފައިވާ ކަމަށް ވެސް ފުލުހުން ބުންޏެވެ.
އެ މައްސަލަ ފުލުހުން އަންނަނީ ތަހުގީގު ކުރަމުންނެވެ. ދާދިފަހުން ވެސް ރ. އިންނަމާދޫގައި ނަރުދަމާގެ މަސައްކަތް ކުރަން އުޅުނު ބިދޭސީއަކަށް ހަމަލާދިން މައްސަލައެއް ފުލުހުންނަށް ވަނީ ހުށަހަޅާފައެވެ. އަދި އެ މައްސަލާގައި ހައްޔަރުކުރި ދެ މީހުން އިންނަމާދޫ ކޯޓުން ދޫކޮށްލި މައްސަލަ ހައިކޯޓުގައި އިސްތިއުނާފު ކުރުމަށް ޕީޖީން ވަނީ ނިންމާފައެވެ.