ދުނިޔޭގައި މިހާރު ހަލުވި ކަމާއެކު ފެތުރި، އެތަޑް ބައެއްގެ ފުރާނަ ނަގަމުންދާ ކޯވިޑް-19 މުޅި ދުނިޔެއިން ޖެހުނު މީހުންގެ އަދަދު 1.5 މިލިއަނަށްވުރެ މައްޗަށް ހިނގައްޖެއެވެ.
އެގޮތުން ދުނިޔެއިން މިހާތަނަށް މިބަލި ވަނީ 1،518،773 މީހުންނަށް ޖެހި، 88،505 މީހުން ބަލީގައި މަރުވެފައެވެ. އަދި ބަލިޖެހުނު މީހުންގެ ތެރެއިން 330،589 މީހުންވަނީ ބަލިން ރަނގަޅުވެފައެވެ. ޗައިނާގެ ވޫހާން ސިޓީއިން މިބަލި ފެށި، ފުރަތަމަކޮޅުގައި އެސިޓީއަށް ބަލީގެ އަސަރު އެންމެ ބޮޑަށް ކުރިނަމަވެސް، މިހާރު ވޫހާންގެ ހާލަތު ބޮޑުތަނުން ރަނގަޅުވެފައެވެ.
މިހާރު ދުނިޔޭގައި މިބަލިޖެހި، ބަލީގައި މަރުވަމުންދާ މީހުންގެ އަދަދު އެންމެ ގިނައީ އެމެރިކާ އަދި އިނގިރޭސިވިލާތުގައެވެ. އެގޮތުން 24 ގަޑިއިރު ތެރޭގައި ކޯވިޑް-19 ޖެހިގެން އެންމެ ގިނަ މީހުން މަރުވެފައިވާ ކަމަށް ރިކޯޑް ކުރެވިފައިވަނީވެސް މި ދެ ޤައުމުންނެވެ.
ނަމަވެސް، ބަލި ފެތުރުނަ ނުދިނުމަށް ދެކުނު ކޮރެއާ އަދި ނިއުޒިލެންޑް ފަދަ ޤައުމުތަކުން އަޅަމުންދާ ލޮކްޑައުން، ޓެސްޓުކުރުން، މޮނީޓަރިންގ އަދި ކަރަންޓީނު ކުރުމުން ފަދަ ފިޔަވަޅުތަށް ކާމިޔާބުކަންވެސް އެޤައުމުތަކުގެ ތަފާސް ހިސާބުތަކުން ދައްކައެވެ.
އެގޮތުން ރާއްޖޭގައިވެސް ކޯވިޑް-19 ފެތުރުނަ ނުދިނުމަށް އިދާރާތަކުންވަނީ އަދި ދަނީވެސް މިފިޔަވަޅުތަށް އަޅަމުންނެވެ. މިހާތަނަށް ރާއްޖޭގައި 19 މީހުންވަނީ މިބައްޔަށް ޕޮޒިޓިވްވެ، 13 މީހުން ބަލިން ރަނގަޅުވެފައެވެ.