ރ. އިންނަމާދޫގައި ބިދޭސީއަކަށް ހަމަލާ ދިން ދެ މީހުންގެ ބަންދަށް އެރަށު ކޯޓުން ހަތް ދުވަސް ޖަހައިފިއެވެ.
މީގެކުރިން އިންނަމާދޫ ކޯޓުން ވަނީ އެމީހުން ދޫކޮށްލާފައެވެ. ބަންދުގެ މުއްދަތު އަލުން ޖަހާފައި ވަނީ އެ މައްސަލަ އަލުން ރިވިއު ކުރުމަށްފަހުއެވެ. އެގޮތުން ފުލުހުން ބުނީ އިންނަމާދޫ ކޯޓުން އަލުން ކޯޓު އަމުރެއް ނެރެދިން ކަމަށާއި އެހެންކަމުން އެ މީހުން ހައްޔަރުކޮށް ބަންދުގެ މުއްދަތު އިތުރު ކުރުމަށް ގެންދިއުމުން އެމީހުންގެ ބަންދަށް ހަތް ދުވަސް ޖަހާދީފައިވާ ކަމަށެވެ.
މި މައްސަލާގައި ހައްޔަރު ކޮށްފައިވަނީ އުމުރުން 48 އަހަރުގެ ދިވެހި ފިރިހެނެކާއި 38 އަހަރުގެ ދިވެހި ފިރިހެނެކެވެ.
އިންނަމާދޫ ކޯޓުން މީގެކުރިން އެ މީހުން ދޫކޮށްލި މައްސަލަ ހައިކޯޓުގައި އިސްތިއުނާފު ކުރާނެ ކަމަށް ޕްރޮސިކިއުޓާ ޖެނެރަލް ހުސައިން ޝަމީމް ވަނީ މީގެކުރިން ވިދާޅުވެފައެވެ.
އެ މާރާމާރީ ހިނގަން މެދުވެރިވީ، 48 އަހަރުގެ ދިވެހި ފިރިހެން މީހާ ދިރުއުޅޭގޭގައި ހުރި ގަސްތަކަށް އޭނަ ފެން ދޭން އުޅުމުގެ ތެރޭގައި، ނަރުދަމާގެ މަސައްކަތް ކުރަން އުޅުނު މީހުން ގެންގުޅޭ މެޝިންތަކަށް ފެން ބުރުމުން ބިދޭސީ މީހާ އެ ޝަކުވާ ކުރުމުން ކަމަށް ފުލުހުން ވަނީ ބުނެފައެވެ.