ރާއްޖެއިން ފުރައިގެން ދިޔަ ފަހުން ކޮވިޑް19 އަށް ޕޮޒިޓިވްވި މީހާއާ ކޮންޓެކްޓުވި ދިވެއްސަކު އެ ބައްޔަށް ޓެސްޓު ކުރުމުގެ މަސައްކަތް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ފަށައިފިއެވެ.
އެޗްޕީއޭ އިން މިއަދު ކޮށްފައިވާ ޓްވީޓެއްގައި ބުނީ ރާއްޖެއިން ފުރިފަހުން ކޮވިޑް19 އަށް ޕޮޒިޓިވްވި ބިދޭސީއަކާއި ޑައިރެކްޓް ކޮންޓެކްޓް ވެފައިވާ ދިވެއްސެއްގެ ފުށުން ބައްޔަށް ޝައްކުކުރެވޭ އަލާމާތްތައް ފެނުމުން، ސާމްޕަލް ނަގައި، ޓެސްޓްކުރުމުގެ މަސައްކަތް ކުރިޔަށްދާ ކަމަށެވެ. އަދި އެމީހާ ވަނީ މޮނީޓާ ކުރުމަށް ކަރަންޓީން ފެސިލިޓީއަކަށް ލެވިފައި ކަމަށް އެޗްޕީއޭ އިން ބުނެއެވެ.
ބިދޭސީ މީހާ ޕޮޒިޓިވްވި މައްސަލާގައި މިހާތަނަށް 33 މީހަކު ވަނީ އެކަހެރިކޮށްފައެވެ. އަދި 21 މީހެއްގެ ސާމްޕަލް މިހާތަނަށް ވަނީ ނަގާފައެވެ. އެމީހާއަކީ ޖޯލި އައިލެންޑު ރިސޯޓާއި ބޮޑުފުށި ރިސޯޓަށް މަސައްކަތެއް ކުރުމަށް އައި މީހެކެވެ.