މެލޭޝިޔާއިން ކޮވިޑް19 އަށް ދިވެއްސަކު ޕޮޒިޓިވްވެއްޖެ

ދުނިޔޭގައި ހަލުވިކަމާއި އެކުގައި މިހާރު ފެތުރެމުން އަންނަ ކޮވިޑް19 އަށް މެލޭޝިޔާއިން ދިވެއްސަކު ޕޮޒިޓިވްވެއްޖެއެވެ.

މިކަމާއި ގުޅިގެން މެލޭޝިއާގައި ހުންނަ ދިވެހިރާއްޖޭގެ އެމްބަސީއިން ބުނީ، މިއަދު މެލޭޝިއާގެ ހެލްތް މިނިސްޓްރީން ކޮވިޑް19 އާއި ގުޅިގެން އާންމުކޮށްފައިވާ ރިޕޯޓުގައި މެލޭޝިއާގައި ދިރިއުޅޭ ދިވެއްސެއް ކޮވިޑް19 އަށް ޕޮޒިޓިވް ވެފައިވާ ކަމަށް ބުނެފައިވާ ކަމަށެވެ. އަދި އެކަން އިތުރަށް ސާފު ކުރުމުގެ މަސައްކަތް ކުރަމުންދާ ކަމަށް އެމްބަސީން ބުނެއެވެ.

މެލޭޝިޔާގެ ހެލްތު މިނިސްޓްރީން މިއަދު ހާމަކުރި ރިޕޯޓެއްގައި ބުނެފައިވަނީ އެގައުމަށް ބައްޔަށް ޕޮޒިޓިވްވި މީހުންގެ ތެރެއިން 416 މީހުންނަކީ މެލޭޝިއާގައި ތިބި އެހެން ގައުމުތަކުގެ މީހުން ކަމަށެވެ. އޭގެތެރޭގައި ރާއްޖެ އަށް ނިސްބަތްވާ މީހަކު ހިމެނޭ ކަމަށް ބުނެފައިވެއެވެ.

މެލޭޝިޔާއިން މިހާތަނަށް 4،119 މީހަކު އެ ބައްޔަށް ޕޮޒިޓިވް ވެފައިވެއެވެ. އަދި އޭގެތެރެއިން 65 މީހަކު މިހާތަނަށް ވަނީ އެގައުމުން މަރުވެފައެވެ. ކޮވިޑް19 އާއި ގުޅިގެން މެލޭޝިއާއިން ވަނީ އެގަމުގެ ލޮކްޑައުންގެ މުއްދަތު އިތުރު ކޮށްފައެވެ.