ދުނިޔޭގެ ސިއްޙަތު ޖަމްޢިއްޔާއިން ކޯވިޑް-19 ޕެންޑެމިކެއްގެ ގޮތުގައި ކަނޑައެޅިތާ މިއަދަށް އެއް މަސް ފުރުނު ދުވަހު، 24 ގަޑި އިރުތެރޭގައި އެބަލިން މަރުވި މީހުންގެ އަދަދު އެމެރިކާގައި 2،108 އަށް އަރައިފިއެވެ.
މިއީ އެޤައުމުގައި މިބަލި ފެތުރެން ފެށި ފަހުނ އެއް ދުވަހުގެ ތެރޭގައި މިބަލިން އެންމެ ގިނަ މީހުން މަރުވި ދުވަހެވެ. އެގޮތުން މިހާރު އެޤައުމުން ކޯވިޑް-19 ޖެހިގެން 18،777 މީހުން ވަނީ މަރުވެފައެވެ. އަދި އެޤައުމުގައި ބަލި ޖެހުނު މީހުންގެ އަދަދު ބައިމިލިއަނަށްވުރެ މައްޗަށްވަނީ ގޮސްފައެވެ.
މުޅި ދުނިޔެއިން މިބަލީގައި 102،000 އަށް ވުރެ ގިނަ މީހުން މަރުވެފައިވާއިރު، އެއްޤައުމަކުން މިބަލީގައި މިހާތަނަށް އެންމެ ގިނަ މީހުން މަރުވެފައިވަނީ އިޓަލީގައެވެ. އެ ޤައުމުން 18،800 މީހުން މަރުވެފައިވާރު، ތަފާސް ހިސާބުތަކުން ދައްކާގޮތުން ކުރިއަށް އޮތް 24 ގަޑިއިރު ތެރޭގައި މިބަލިޖެހިގެން މަރުވާ މީހުންގެ އަދަދު އިޓަލީއަށްވުރެ އެމެރިކާގައި ގިނަވާނެކަމަށް ލަފާކުރެވެއެވެ.
މުޅި ދުނިޔޭގައި މިބަލި ހަލުވިކަމާއެކު ފެތުރެމުން ދާއިރު، ސިއްޙީ މާހިރުންގެ އާދޭހަކީ އެންމެންވެސް ގޭގައި މަޑުކޮށް، ވީހާވެސް ގިނައިން އަތް ދޮވެ، ސާފުތާހިރުކޮށް ބެހެއްޓުމަށެވެ.