ޕިލިޕީންސް އިން ރާއްޖެއައި ދިވެއްސަކު ކޮވިޑް19 އަށް ޕޮޒިޓިވް ވެއްޖެކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
މި މީހާއަކީ ރާއްޖެއިން މި ބައްޔަށް ޕޮޒިޓިވްވި 20ވަނަ މީހާއެވެ. ކޮވިޑް19 އަށް އެންމެ ގިނައިން ރާއްޖެއިން ޕޮޒިޓިވްވި މީހުންނަކީ ބިދޭސީންނެވެ. އެއީ 15 ބިދޭސީންނެވެ. އޭގެތެރެއިން ދެ މީހަކު ފުރައިގެން ގޮސްފައިވާއިރު ބާކީ ތިބި މީހުންނަކީ ރާއްޖޭގެ ރިސޯޓުތަކުގައި ޗުއްޓީ ހޭދަ ކުރުމަށް އައި ފަތުރުވެރިންނާއި ރިސޯޓުތަކުގައި ވަޒީފާ އަދާކުރާ ބިދޭސީންނެވެ.
އެ 15 މީހުންގެ ތެރެއިން 13 މީހަކު ވަނީ ބަލިން އެއްކޮށް ރަނގަޅުވެފައެވެ. ރާއްޖެއިން މި ބައްޔަށް ޕޮޒިޓިވްވި ދިވެހިންގެ ތެރެއިން މި ބައްޔަށް އެންމެ ގިނަ މީހުން ޕޮޒިޓިވްވީ އިނގިރޭސިވިލާތުން ރާއްޖެ އައިސްފައިވާ މީހުންނެވެ.
ރާއްޖޭގައި ގާއިމްކޮށްފައިވާ ކަރަންޓީން އެކި ފެސިލިޓީސްތަކުގައި 862 މީހަކު ކަރަންޓީން ކޮށްފައިވާއިރު ރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުމެއްގައި އައިޖީއެމްއެޗް ހޮސްޕިޓަލުގެ ޑޮކްޓަރ ޑރ.މޫސާ މުރާދު ވިދާޅުވީ ކޮވިޑަށް ޓެސްޓުކޮށް ނަތީޖާ ނެގެޓިވްވުމުން މިއަދު 19 މީހަކު ދޫކޮށްލާފައިވާ ކަމަށާއި އަދި އިތުރު 82 މީހަކު ކަރަންޓީނުން ދޫކޮށްލުމަށް ސާމްޕަލް ނަގާފައިވާ ކަމަށެވެ.
އެގޮތުން އެ މީހުންގެ ނަތީޖާތައް ވެސް ނެގެޓިވް ވުމުން ކަރަންޓީނުން ދޫކޮށްލާނެ ކަމަށްވެސް ޑރ.މުރާދު ވިދާޅުވިއެވެ.