ސިއްހީ ކުއްލި ނުރައްކަލުގެ ހާލަތުގައިވެސް ކޯޓުތަކުގެ މަސައްކަތްތައް ހުއްޓުމެއް ނެތި ކުރިއަށް ގެންދިޔުމަށް ކޯޓުތަކުން ޝަރީއަތް ކުރުމާ ގުޅޭ އުސޫލުތައް އެކުލަވާލައިފިއެވެ.
އެ އުސޫލުގައިވާ ގޮތުގައި އާއްމު އުސޫލެއްގެ ގޮތުން ސުޕްރީމް ކޯޓު ހުންނާނީ މިފަދަ ހާލަތެއްގައި [ސިއްހީ ކުއްލި ނުރައްކަލުގެ ހާލަތުގައި] ބަންދުކޮށްފައެވެ. ނަމަވެސް ކޮންމެހެން ކުރަންޖެހޭ މަސައްކަތްތައް މުވައްޒަފުން ގޭގައި ތިބެގެން ކުރަމުން ގެންދާނެއެވެ.
މިފަދަ ހާލަތެއްގައި އެ ކޯޓަށް މައްސަލަ ހުށަހެޅުމާއި ޝަކުވާ ހުށަހެޅުން ފަދަ ކަންކަން ކުރާނީ އީމެއިލްގެ ޒަރިއްޔާއިންނެވެ. އަދި އޮންލައިންކޮށް އެފަދަ ކަންކަން ނުކުރެވޭ ފަރާތްތަކަށް ކޮންމެ ހަފްތާއެއްގެ ހޯމަ އަދި ބުރާސްފަތި ދުވަހު ހެނދުނު 10:00 އިން މެންދުރު 2:00 އަށް ސުޕްރީމް ކޯޓު ހުޅުވިފައި ހުންނާނެއެވެ. އެ ދެ ދުވަހު ކޯޓަށް އައިސް މައްސަލަތައް ހުށަހެޅޭނެއެވެ.
އޮފީސްތައް ބަންދުކޮށްފައި ހުންނަ ދުވަސްތަކުގައި ކޮންމެހެން ހުށަހަޅަން ޖެހޭ މައްސަލަތައް ކޯޓުން ބަލައިގެން ނަމަވެސް ސިއްހީ ކުއްލި ނުރައްކަލުގެ ހާލަތު ފިލައިދިއުމުން އެހެން މައްސަލަތައް ހުށަހެޅޭނެ ކަމަށް އެ ސުޕްރީމް ކޯޓުގެ އުސޫލުގައި ބުނެފައިވެއެވެ.
ސިއްހީ ކުއްލި ނުރައްކަލުގެ ހާލަތުގައި ސުޕްރީމް ކޯޓުގެ މަސައްކަތްތައް ކުރިއަށްގެންދާނެ ގޮތުގެ އުސޫލެއް އެކުލަވާލި އިރު މިދިޔަ ހަފްތާގެ ތެރޭގައި އެ ކޯޓުން ވަނީ ޝަރީއަތްތައް ވީޑިއޯ ކޮންފަރެންސް މެދުވެރިކޮށް ބާއްވާނެ ގޮތުގެ އުސޫލެއްވެސް އެކުލަވާލައިފައެވެ.