ރާއްޖޭގައި ހިންގާ އަމިއްލަ ކޮލެޖުތަކުގެ ވެރިން ހަޔާ އެޑިއުކޭޝަން މިނިސްޓަރާ ބައްދަލު ކުރަން ނިންމައިފިއެވެ.
ރާއްޖޭގައި ހިންގާ އަމިއްލަ ކޮލެޖުތައް ތަމްސީލުކުރާ ޖަމްއިއްޔާ، ޕްރައިވެޓް ހަޔާ އެޑިއުކޭޝަން އެސޯސިއޭޝަން އޮފް މޯލްޑިވްސް އިން ބުނީ ކޮވިޑް19 އާއި ގުޅިގެން ސަރުކާރުން އަޅާފައިވާ ފިޔަވަޅުތަކުގެ ސަބަބުން، ޕްރައިވެޓް ކޮލެޖުތަކަށް ދިމާވެފައިވާ ދަތިތަކާ ގުޅޭގޮތުން އެ ޖަމިއްޔާއިން މަޝްވަރާ ކޮށްފައިވާ ކަމަށެވެ. އަދި އެ މަޝްވަރާގައި ނިންމާފައިވަނީ ޕްރައިވެޓް ކޮލެޖުތަކަށް މިހާރު ދިމާވެފައިވާ ގޮންޖެހުން ތަކާ ބެހޭގޮތުން ހަޔާ އެޑިއުކޭޝަން މިނިސްޓަރާ ބައްދަލުކޮށް އެކަން ހިއްސާ ކުރުމަށް ކަމަށެެވެ.
މީގެއިތުރުން ކޮވިޑް19 ގެ ސަބަބުން އަޅާފައިވާ ފިޔަވަޅުތަކާއި ގުޅިގެން އެ ޖަމިއްޔާއިން ވަނީ މިނިސްޓަރަށް ސިޓީއެއް ފޮނުއްވާފައެވެ. އެ ސިޓީގައި ބުނެފައި ވަނީ، ކޮވިޑް19 އާ ގުޅިގެން ސަރުކާރުން އަޅާފައިވާ ފިޔަވަޅުތަކުގެ ސަބަބުން، ޕްރައިވެޓް ކޮލެޖުތަކަށް ވަރަށް ބޮޑެތި ގެއްލުންތަކަކާ ކުރިމަތިލާން ޖެހިފައިވާ ކަމަށެވެ. އަދި އަމިއްލަ ކޮލެޖުތަކަށް ކުރިމަތިވަމުން އަންނަ ގޮންޖެހުންތަކަށް ހައްލެއް ނުލިބިއްޖެ ނަމަ އެތަންތަން ހުއްޓުމަކަށް އަތުވެދާނެ ކަމަށްވެސް ބުނެފައިވެއެވެ.
ކޮވިޑް19 އާ ގުޅިގެން ސަރުކާރުން ވަނީ ސްކޫލުތަކާއި ކޮލެޖު އަދި ޔުނިވާސިޓީތައް ބަންދު ކުރުމަށް ނިންމާފައެވެ. އެގޮތަށް ނިންމާފައިވަނީ އާއްމު ސިއްހަތުގެ ކުއްލި ނުރައްކަލުގެ ހާލަތު އިއުލާންކޮށްފައިވާތީއެވެ.