ކޮވިޑް19 ފެތުރެން ފެށުމާ އެކު އެންމެ ގިނައިން ލޭ ހަދިޔާ ކުރަމުން އަންނަ ރިޒޯޓުތައް ހުއްޓުމަކަށް އައިސްފައިވުމުން އާއްމު ރައްޔިތުން ލޭ ހަދިޔާ ކޮށްދިނުމަށް މޯލްޑިވްސް ބްލަޑް ސާވިސަސް (އެމްބީއެސް) އިން އަނެއްކާ ވެސް އެދިއްޖެއެވެ.
އެމްބީއެސް އިން ކޮށްފައިވާ ޓްވީޓެއްގައި ބުނީ އެ ސާވިސްގެ ބްލަޑް ސްޓޯރެޖު ވަރަށް ބޮޑަށް ދަށްވެފައިވާ ކަމަށެވެ. ހާއްސަކޮށް އޯ ޕޮޒިޓިވް އަދި ބީ ޕޮޒިޓިވް ލޭ ހުރި މިންވަރު މަދު ކަމަށް އެ ސާވިސް އިން ވަނީ ބުނެފައެވެ. އެހެންކަމުން ކޮންމެ ހަފްތާއެއްގެ ވެސް ހުކުރު އަދި ހޮނިހިރު ދުވަސް ފިޔަވާ ހަފްތާއެއްގެ އެހެން ހުރިހާ ދުވަހެއްގެ ހެނދުނު 8:00 އިން މެންދުރު 3:00 އަށް ލޭ ހަދިޔާ ކުރެވޭނެ ކަމަށް ވެސް އެމްބީއެސް އިން ބުނެފައިވެއެވެ.
ރިސޯޓުތަކަކީ އާއްމު ގޮތެއްގައި ލޭ ހަދިޔާ ކުރުމުގެ ހަރަކާތްތައް ހިންގަމުން އަންނަ ތަންތަނެވެ. ނަމަވެސް ކޮވިޑް19 ގެ ސަބަބުން ރިސޯޓުތައް ބަންދުކޮށްފައިވުމުން މިފަދަ ހަރަކާތްތަކަށް ވަނީ މަޑުޖެހުމެއް އައިސްފައެވެ. އެހެންކަމުން ވީހާވެސް ގިނަ މީހުން ލޭ ހަދިޔާ ކޮށްދިނުމަށް ބްލަޑް ސާވިސް އިން އަންނަނީ ބުނަމުންނެވެ.