މާލެ ސަރަހައްދުގައި ތޮށްޖެހިފައިވާ ތަންތަނުގައި ދިރިއުޅޭ ބިދޭސީން އެމީހުންނަށް ހާއްސަ ފެސިލިޓީއަކަށް ބަދަލުކޮށްފިއެވެ.
އެގޮތުން އިއްޔެ ވަނީ 200 މީހަކު ހުޅުމާލޭގައި ގާއިމް ކޮށްފައިވާ ހާއްސަ ފެސިލިޓީތަކަށް ބަދަލުކޮށްފައެވެ. މާލޭގައި ތޮއްޖެހިގެން ދިރިއުޅެމުންދާ 5000 މީހުން އެހެން ތަންތަނަށް ބަދަލު ކުރަން ހަމަޖެހިފައިވެއެވެ. 200 މީހުން ގެންދިޔައީ އަމީން ހިޔާ ލޭބާ އެކޮމޮޑޭޝަން ފެސިލިޓީއަށެވެ. ސަރުކާރުން މަސައްކަތް ކުރަމުން އަންނަނީ ހުޅުމާލޭގައި އާއި އެހެނިހެން ތަންތާނގައި ބިދޭސީން ބޭތިއްބުމަށް އިތުރު އެކޮމޮޑޭޝަން ފެސިލިޓީތައް ގާއިމް ކުރަމުންނެވެ.
މި މަސައްކަތް އިއްޔެ ކުރިއަށް ގެންދިޔައީ އެމްއެންޑީއެފް، ފުލުހުންނާއި، އެޗްޕީއޭ، އެޗްޑީސީގެ އިތުރުން މާލޭ ސިޓީ ކައުންސިލުން ވެގެން ނެވެ. މިކަމާއި ގުޅިގެން މިއަދު އިމިގްރޭޝަނުން ބުނީ އެ ބިދޭސީން ތިބުމަށް ހަމަޖައްސާފައިވަނީ ތިބޭނީ އެޗްޑީސީއިން ހުޅުމާލޭގައި ހަމަޖައްސާފައިވާ ހާއްސަ ފެސިލިޓީއެއްގައި ކަމަށެވެ.
އެ ބިދޭސީން ވަގުތީ ފެސިލިޓީއަކަށް ބަދަލުކުރުމަށް އެ ފެސިލިޓީއަށް ގެންގޮސް ރެޖިސްޓްރީ ކުރުމުގެ މަސައްކަތް މިހާރުވެސް ކުރިއަށްގެންދެއެވެ. އިމިގްރޭޝަނުން ބުނީ އެ ފެޗިލިޓިުގައި ދިރިއުޅޭ ބިދޭސީންގެ ކަންކަން ބަލަމުން ގެންދާނީ އެޗްޑިސީއިން ކަމަށެވެ.
އިމިގްރޭޝަނުން ބުނީ ގަވާއިދާ ހިލާފަށް ދިރިއުޅޭ ބިދޭސީއެއް އެ ފެސިލިޓީއަށް ގެންދާނެ ކަމަށެވެ. އަދި އިކޮނޮމިކް މިިނިސްޓްރީގެ ރެގިއުލަރައިޒޭޝަން ޕްރޮގްރާމްގެ ދަށުން ގަވާއިދާ ހިލާފަށް ތިބި ބިދޭސީން ގާނޫނުގެ ތެރެއަށް ވަނުމުގެ ފުރުސަތު ލިބިގެންދާނެ ކަމަށްވެސް އިމިގްރޭޝަނުން ބުންޏެވެ.