ކޮވިޑް19 އާ ގުޅިގެން ރިސޯޓު އަދި ސަފާރީތަކުން މީހުން ފޭބުން މަނާކޮށްފައި އޮތުމަށްފަހު 138 ރިސޯޓު އަދި ސަފާރީީން މީހުން ފޭބުމުގެ ހުއްދަ ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ދީފިއެވެ.
ހެލްތު މިނިސްޓްރީން ވަނީ މީހުން ފޭބުމުގެ ހުއްދަ ދީފައިވާ ރިސޯޓުތަކާއި ސަފާރީތަކުގެ މައުލޫމާތުތައް އާއްމުކޮށްފައެވެ. އެ މައުލޫމާތުގައިވާ ގޮތުގައި 69 ރިސޯޓާއި 69 ސަފާރީން މީހުން ފޭބުމުގެ ހުއްދަ ވަނީ ދީފައެވެ. އެތަންތަނަކީ ފުރިހަމަ ކުރަންޖެހޭ ކަންކަން ފުރިހަމަ ކުރުމަށްފަހު މީހުން ފޭބުމުގެ ހުއްދަ ދީފައިވާ ތަންތަނެވެ.
ހެލްތު މިނިސްޓްރީން އާއްމުކޮށްފައިވާ މައުލޫމާތުގައިވާ ގޮތުގައި މީހުން ފޭބުމުގެ ހުއްދަ އަށް އެދި ހުށަހަޅާފައިވާ ތަންތަނުގެ ތެރޭގައި ފުރިހަމަ ކުރަންޖެހޭ ކަންކަން ފުރިހަމަ ނުކުރުމުގެ ސަބަބުން މީހުން ފޭބުމުގެ ހުއްދަ ދީފައި ނުވާ ތަންތަންވެސް ހިމެނެއެވެ.
މި މަހުގެ 10ވަނަ ދުވަހު އެޗްޕީއޭ އިން ވަނީ ދިޔަ މަހުގެ 27ވަނަ ދުވަހުން ފެށިގެން ރާއްޖެއިން އޮން އެރައިވަލް ވިސާ ދޫކުރުން ހުއްޓާލާފައިވާތީ ހާލަތްތަކަށް ބަލައި ރިސޯޓުތަކުގައި ތިބި މީހުން އެހެން ރަށްތަކަށް ދިއުމުގެ ހުއްދަ ދިނުމަށް ނިންމާފައިވާ ކަމަށް ބުނެފައެވެ.