މުޅި ދުނިޔެއަށް ފެތުރިފައިވާ ކޯވިޑް-19 ގެ އަސަރު އެންމެ ބޮޑަށް ކޮށްފައިވާ އެއް ޤައުމު ކަމަށްވާ ސްޕެއިންގައި ކޯވިޑް-19 އާއި ދެކޮޅަށް އަޅާފައިވާ ލޮކްޑައުންގެ ފިޔަވަޅުތަށް ލުއި ކުރުމަށް އެޤައުމުން ނިންމައިފިއެވެ.
ކޯވިޑް-19 ޖެހިގެން 17،500 އާއި ގާތް ކުރާ އަދަދަކަށް މީހުންމަރުވެފައިވާ ސްޕެއިން އިން މިގޮތަށް ނިންމާފައިވަނީ އެޤައުމުގެ އިޤްތިޞާދު އަޑިއަޅައިގެން ދިޔުމުން ހުއްޓުވުމަށެވެ. އެގޮތުން މެނުފެކްޗަރިންގ، ކޮންސްޓްރަކްޝަން އަދި އެނޫންވެސް ބައެއް ޚިދުމަތްދޭ ތަންތަނުގައި މަސައްކަތްކުރާ މީހުންނަށް ވަނީ ވަރުގަދަ ސަލާމަތީ އިރުޝާދުތަކާއެކު އަނބުރާ މަސައްކަތަށް ނުކުތުމުގެ ހުއްދަ ދީފައެވެ. އަދި ޤައުމުގެ ދެން ތިބި މީހުން އަދިވެސް ތިބެން ޖެހެނީ ގޭގައެވެ.
ސްޕެއިންގެ ހެލްތު މިނިސްޓްރީ އިން އަންގާފައިވާ ގޮތުގައި އެޤައުމުގައި ނޮވެލް ކޮރޯނާވައިރަސް ޖެހިގެން މަރުވާ މީހުންގެ އަދަދު ވަނީ ދަށްވެފައެވެ. އެގޮތުން އާދިއްތަ ދުވަހުގެ 619 މަރާއި ޚިލާފަށް، ފާއިތުވި 24 ގަޑިއިރު ތެރޭގައި މަރުވެފައިވާ މީހުންގެ އަދަދުވަނީ 517 އަށް ވެއްޓިފައެވެ. މިބަލީގައި އެޤައުމުން މިހާތަނަށް ޖުމްލަ 17،489 މީހުންވަނީ މަރުވެފައެވެ.
ހަފްތާ ބަންދުގައި އެޤައުމުގެ ޕްރައިމް މިނިސްޓަރ ޕެޑްރޯ ސަންޗެޒް ވިދާޅުވި ގޮތުގައި " އަހަރެމެން މިތިބާ މޮޅުވެ، އަންބުރާ ޢާންމު ހާލަތަށް ދިއުމާއި އަދި ވަރަށް ދުރުގައި. ނަމަވެސް، އަހަރެމެން އަނބުރާ މަގު މައްޗަށް ނިކުންނަން ބޭނުންވާ ވަރަށް ވުރެ ބޮޑަށް، ޤައުމު އަނބުރާ ބަލިމަޑުކަމުގެ ތެރެެއަށް ވެއްޓުނަ ނުދީ، މިހަނގުރާމައިން މޮޅުވާން ބޭނުން".
ސްޕެއިންގައި އަލަށް ބަލި ޖެހޭ މީހުންގެ އަދަދު ދަނީ ދަށްވަމުންނެވެ. އެގޮތުން އާ 3،477 ބަލި މީހުންނާއެކު އެޤައުމުން ކޯވިޑް ޖެހިފައިވާ މީހުންގެ އަދަދުވަނީ 169,496 އަށް އަރާފައެވެ.