ޖޭ ޑަބްލިއު މެރިއޮޓް މޯލްޑިވްސް އެންޑް ސްޕާ ރިސޯޓުން މޫދަށް ފުންމާލި މީހާ އަދިވެސް ނުފެންނާތީ އެމީހާ ހޯދުމަށް އާއްމުންގެ އެހީތެރިކަމަށް އެމްއެންޑީއެފް އިން އެދިއްޖެއެވެ.
އެ ރިސޯޓުން މޫދަށް ފުންމާލާފައިވަނީ އިންޑިއާ އަށް ނިސްބަތްވާ އުމުރުން 30 އަހަރުގެ ފިރިހެނެކެވެ. އޭނާ އަކީ އެ ރިސޯޓުގެ މިސްކިތުގެ އިމާމެވެ. އެމްއެންޑީއެފް އިން ބުނީ އެމީހާ ގެއްލުނުތާ މިހާރު ހަފްތާއަކަށް ވުރެ ގިނަ ދުވަސްވެފައިވާ ކަމަށާއި އޭނާއާ ގުޅޭ މައުލޫމާތެއް އެނގޭ މީހަކު ހުރި ނަމަ، ލަސްނުކޮށް އެމްއެންޑީއެފަށް އެންގުމަށް އެދޭ ކަމަށެވެ. އަދި ދަތުރު ކުރާ މީހުން އަދި ރަށްރަށުގައި ދިރިއުޅެމުން އަންނަ މީހުން އެމީހާ ހޯދަން މަސައްކަތްކޮށް ދިނުމަށް އެމްއެންޑީއެފުން ވަނީ އެދިފައެވެ.
މި މަހުގެ 9ވަނަ ދުވަހު އެމްއެންޑީއެފް އިން ބުނީ މިހާތަނަށް ކޯސްޓްގާޑުގެ ޑައިވަރުން ކުރި ޑައިވް އާއި ކަނޑުގެ ސަރަހައްދު ބެލުމުގައި ކުރި މަސައްކަތުން އޭނާ ފެނިފައިވާ ނުވާ ކަމަށެވެ. އަދި ދެ ފަހަރު ޑައިވްކޮށްގެން މިހާތަނަށް 136،311،245 ސްކުއާ މީޓަރުގެ ސަރަހައްދެއް ބަލާފައިވާ ކަމަށްވެސް އެމްއެންޑީއެފުން ބުނެއެވެ.
މި ހާދިސާގެ ރިޕޯޓު އެމްއެންޑީއެފް ނޮދަން އޭރިއާ އަށް ލިބިފައިވަނީ މިދިޔަ ހޯމަ ދުވަހުގެރޭ 10:13 ހާއިރު އެވެ. އެ ރިސޯޓުގެ ސީސީޓީވީން ފެންނަ ގޮތުގައި އެމީހާ ފޯނު ކޯލެއްގައި ހުރެފައި، ރިސޯޓުގެ ސަޕްލައި ޖެޓީން މޫދަށް ފުންމާލިތަން ފެނިފައިވާ ކަމަށް އެމްއެންޑީއެފުން ވަނީ ބުނެފައެވެ.