އދ މަހިބަދޫ ފަޅުގައި އޮތް އުޅަނދުތަކެއްގައި ރޯވި މައްސަލަ ފުލުހުން ތަހުގީގު ކުރަން ފަށައިފިއެވެ.
އެމްއެންޑިއެފުން ބުނީ މަހިބަދޫ ފަޅުގައި 5 ލޯންޗަކާއި ދެ ޑިންގީއެއްގައި ރޯވެ އަދަމުންދާކަމުގެ ރިޕޯޓް ލިބިފައިވަނީ ފަތިހު 5:45 އެހާކަންހާއިރު ކަމަށެވެ. މި ހާދިސާގައި އެއްވެސް މީހަކަށް އަނިޔާއެއް ލިބުނު ކަމުގެ ރިޕޯޓް އަދި ލިބިފައި ނުވާކަމަށް އެމްއެންޑީއެފުން ބުނެއެވެ. މި އުޅަނދުތަކުގައި ރޯވި އަލިފާންގަނޑު ނިންވާލެވުނީ ގާތްގަޑަކަށް ތިން ގަޑިރެއްހާއިރު ފަހުންނެވެ.
މި ހާދިސާގައި ފުލުހުންގެ ލޯންޗަކާއި އަތޮޅު ކައުންސިލްގެ ލޯންޗާއި ސީ އެމްބިއުލާންސާއި އަމިއްލަ ވިޔަފާރިވެރިވެރިއެއްގެ ދެ ލޯންޗާއި 2 ޑިންގީއެއްގައި ވަނީ ރޯވެފައެވެ. މި ހުރިހާ އުޅަނދެއްވެސް ވަނީ ބޭނުންނުކުރެވޭ ވަރަށް އަނދާފައެވެ.
ފުލުހުންގެ މީޑިއާ އޮފިޝަލް ވިދާޅުވީ އެ ހާދިސާގެ ރިޕޯޓު ފުލުހުންނަށް ލިބިފައި ވަނީ ފަތިހު 05:22 ހާއިރު ކަމަށެވެ. އޮފިޝަލް ވިދާޅުވީ މިހާރު މި ހާދިސާ ތަހުގީގު ކުރަން ފަށާފައިވާ ކަމަށެވެ.
އަލިފާންގަނޑު ކޮންޓްރޯލްވީ އެމްއެންޑީއެފާއި ފުލުހުންނާއި އެރަށު ރައްޔިތުން ގުޅިގެން ކުރި މަސައްކަތުން މިއަދު ހެނދުނު 8:05 ހާއިރު ކަމަށް އެމްއެންޑީއެފް އިން ބުންޏެވެ.