ދުނިޔޭގެ ސިއްޙަތު ޖަމްޢިއްޔާ (ޑަބްލިއު. އެޗް. އޯ) އަށް ދޭ އެހީ ހިފެހެއްޓުމަކީ ބިރުވެރި ކަމެއްގެ ގޮތުގައި ބިލް ގޭޓްސް ބުނެފިއެވެ.
އޭނާ މިހެން ބުނެފައިވަނީ ޑަބްލިއު. އެޗް. އޯ ފެއިލް ވެއްޖެކަމަށްބުނެ، އެ ޖަމްޢިއްޔާއަށް އެމެެރިކާއިން ދެމުން އަންނަ އެހީ ހިފަހައްޓަން އެ ޤައުމުގެ ރައީސް ޑޮނަލްޑް ޓްރަމް ނިންމަވާފައިވާ ކަމަށް އިއްޔެ ބޭއްވި ނޫސްވެރިންގެ ބައްދަލުވުމެއްގައި އިއުލާންކޮށްފައިވަނިކޮށެވެ.
ޓްރަމްޕް މިގޮތަށް ކަން ކުރުމަށް ނިންމާފައިވަނީ ކޯވިޑްގެ ކަންކަމުގައި ޑަބްލިއު. އެޗް. އޯ އިހުމާލުވެފައިވާ ކަމަށްބުނެ، އެ ޖަމްޢިއްޔާއިން ކަންކަން ފޮރުވަންވެސް މަސައްކަތްކުރާކަމަށް ތުހުމަތު ކުރަމުންނެވެ. އެގޮތުން މި ކަންކަމުގައި ޑަބްލިއު. އެޗް. އޯގެ މަސައްކަތް ހުރި ގޮތުގެ ރިވިއުއެއް ކުރާނެ ކަމަށާއި، އެ ރިވިއު ނިމެންދެން އެ ޖަމްޢިއްޔާއަށް އެމެރިކާއިންދޭ އެހީ ހިފަހައްޓަން ކަމާބެހޭ ފަރާތްތަކަށް މިހާރު އިރުޝާދު ދީފައިވާނެ ކަމަށް ވެސް ޓްރަމްޕް ވިދާޅުވިއެވެ.
މިކަމާއި ގުޅިގެން ގޭޓްސް ކުރި ޓްވީޓެއްގައި އިތުރަށް ބުނެފައިވަނީ، ޑަބްލިއު. އެޗް. އޯގެ މަސައްކަތުން ކޯވިޑް-19 ދުނިޔޭގައި ފެތުރޡޭ މިންވަރު މަޑު ޖައްސާލެވިފައިވާ ކަމަށާއި، އެ ޖަމްޢިއްޔާގެ މަސައްކަތް ހުއްޓާލެވިއްޖެނަމަ، އެހެން ޖަމްޢިއްޔާއަކަށް ޑަބްލިއު. އެޗް ކުރާ މަސައްކަތް ނުކުރެވޭނެ ކަމަށެވެ. އަދި ދުނިޔެއަށް ކޮންމެހެންވެސް ޑަބްލިއު. އެޗް. އޯގެ ބޭނުން މިހާރު ޖެހިފައިވާ ކަމަށް ގޭޓްސްގެ ޓްވީޓްގައި އޭނާ ފާހަގަ ކުރިއެވެ.
އެމެރިކާއަކީ ޑަބްލިއު. އެޗް. އޯއަށް އެންމެ ބޮޑު އެހީތެރިކަމެއް ފޯރުކޮށްދެމުން އަންނަ އެއް ޤައުމެވެ. އެގޮތުން މިދިޔަ އަހަރު އެކަނިވެސް އެމެރިކާއިން ވަނީ އެ ޖަމްޢިއްޔާއަށް 316 މިލިއަން ޕައުންޑްގެ އެހީ ދީފައެވެ. މިއީ ޑަބްލިއު. އެޗް. އޯގެ ބަޖެޓްގެ 15 ޕަސެންޓެވެ.