ކޮވިޑް-19 އިން ރާއްޖެ ސަލާމަތްކުރުމަށް ހުރިހާ ރައްޔިތުން ވެސް ގޭގައި މަޑުކޮށްދެއްވުމަށް ރައީސުލް ޖުމުހޫރިއްޔާ އިބްރާހިމް މުހައްމަދު ސޯލިހް އާދޭސް ދަންނަވައިފިއެވެ.
ދިވެހި ރައްޔިތުންނާ ބައްދަލުކުރައްވައި ރައީސް އަސަރާއެކު ދެއްވި ޚިތޯބުގައި ވިދާޅުވީ، ދިވެހި ސަރުކާރުން މިބަލި ފެތުރުނަ ނުދިނުމަށް ކުރެވެން އޮތް ހުރިހާ ކަމެއް ކުރާނެ ކަމަށާއި، އަޅަން ޖެހޭ ހުރިހާ ފިޔަވަޅެއް އަޅާނެ ކަމަށެވެ.
ބަދަލުގައި ރައްޔިތުންގެ ކިބައިން އެދެނީ ހެލްތް ޕްރޮޓެކްޝަން އޭޖެންސީ އިން ދެއްވާފައިވާ ލަފަޔާ އެއްގޮތަށް ގެއިން ނުނިކުމެ ތިއްބެވުމަށާއި ގިނަ ގިނައިން އަތް ދޮވެ ސާފުތާހިރުވެ ތިބުމަށް ކަމަށް ރައީސް ވިދާޅުވިއެވެ.
އަދި އެކަކު އަނެކަކާމެދު އޯގާތެރިކަމާއި އެކުވެރިކަމާއެކު މުޢާމަލާތް ކުރުމަށާއި ކެތްތެރިކަން އިސްކުރައްވައި، އިސްލާމްދީނުގެ މަތިވެރި އުޞޫލުތަކުގެ ތެރެއިން، އެކަކު އަނެކަކަށް އެހީތެރިވުމަށް ވެސް ރައީސް ވަނީ އިލްތިމާސްކުރައްވާފައެވެ.
"މިހާތަނަށް އެއްވެސް ބޭހެއް އަދި ވެކްސިނެއް ހޯދިފައި ނެތް މި ބަލިން ރައްކާތެރިވުމަށް، އެޅެން އޮތް އެންމެ މުހިންމު ފިޔަވަޅަކީ، ބޭރުތެރެއަށް ނުނިކުންނަވައި، ގޭގައި މަޑުކުރެއްވުން. އަދި ޞިއްޙީ ޚިދުމަތްތެރިން ދެއްވާ ލަފަޔާ އެއްގޮތަށް، ގިނަގިނައިން އަތް ދޮވެ، ސާފުތާހިރުކަމުގެ މިންގަނޑުތަކާ އެއްގޮތަށް ޢަމަލުކުރެއްވުން" ރައީސް ވިދާޅުވިއެވެ.
މި ބަލިން ރައްޔިތުން ރައްކާތެރިކުރުމުގައި، އެއްވެސް ވަރުބަލިކަމެއްނެތި، އެންމެ ފުރަތަމަ ދުވަހުން ފެށިގެން، ކުރީ ސަފުގައި މަސައްކަތް ކުރައްވަމުން ގެންދަވާ ހުރިހާ ޞިއްޙީ ޚިދުމަތްތެރިންނަށާއި، މަސައްކަތް ކުރައްވާ ހުރިހާ ބޭފުޅުންނަށް، ވެސް ރައީސް ވަނީ ހާއްސަ ޝުކުރެއް އަދާކުރައްވާފައެވެ.
މިއަދު ހެނދުނު މާލެއިން ކޮވިޑަށް މީހަކު ޕޮސިޓިވް ވެފައިވާއިރު އެޗްޕީއޭ އިން ވަނީ އޭނާއާ ބައްދަލުވި މީހުން ދަނެގަތުމަށް އާންމުންގެ އެހީތެރިކަމަށް އެދިފައެވެ. އެގޮތުން ފާއިތުވެދިޔަ 14 ދުވަސް ތެރޭ މ، ޖަރީމާގެއަށް ގޮސްފައިވާ މީހުން އެޗްޕީއޭ އަށް މައުލޫމާތު ދެއްވުމަށް އެދިފައިވެއެވެ.
ރައީސް އިތުރަށް ވިދާޅުވީ، 11 މީހެއް ޝައްކު ކުރެވި ސާމްޕަލް ނެގިފައިވާ ކަމަށާއި ނަތީޖާ ލިބުނުހާ އަވަހަށް ރައްޔިތުންނާ ހިއްސާ ކުރައްވާނެ ކަމަށެވެ.
ކޮވިޑް އަށް ރާއްޖެއިން މިހާރު 21 މީހުން ޕޮސިޓިވް ވެފައިވާއިރު، 16 މީހަކު ވަނީ ފަސޭހަ ވެފައެވެ.