ކޮވިޑް19 އަށް މާލެއިން ޕޮޒިޓިވްވި މީހާއާ ގުޅުންހުރި 11 މީހެއްގެ ތެރެއިން 10 މީހެއްގެ ސާމްޕަލް ކޮވިޑް19 އަށް ނެގެޓިވް ވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ އިން މިރޭ ކުރި ޓްވީޓެއްގައި ބުނީ ޕޮޒިޓިވްވި މީހާއާ ކޮންޓެކްޓުވި 11 މީހުންގެ ތެރެއިން 10 މީހުން ކޮވިޑް19 އަށް ނެގެޓިވް ވެފައިވާ ކަމަށެވެ. އަދި ޕޮޒިޓިވްވީ އެންމެ މީހެއް ކަމަށާއި އެއީ ކުޑަ ކުއްޖެއް ކަމަށްވެސް އެޗްޕީއޭ އިން ބުންޏެވެ.
މިއަދު ގައުމާއި މުހާތަބު ކުރައްވާ ވާހަކަދައްކަވަމުން ރައީސް އިބްރާހީމް މުހައްމަދު ސޯލިހު ވިދާޅުވީ މާލެއިން ޕޮޒިޓިވްވި މީހާއާ ބައްދަލުވި މީހުން މިހާރު ދެނެގަނެވިފައިވާ ކަމަށާއި އެކި ގޮތްގޮތުން އޭނާއާ ބައްދަލުވި އެހެން މީހުން ދެނެގަތުމުގެ މަސައްކަތް ވެސް ކުރަމުންދާ ކަމަށެވެ. އަދި 11 މީހެއްގެ ސާމްޕަލް ނެގި ކަމަށް ރައީސް ވިދާޅުވިއެވެ.
މިއަދު މާލެއިން ކޮވިޑް19 އަށް ޕޮޒިޓިވްވި މީހާއާ ކޮންޓެކްޓުވި ކަމަށް ބެލެވޭ 54 މީހަކު މިހާރުވެސް ވަނީ ހޯމް އައިސޮލޭޝަންގައި ބަހައްޓާފައެވެ.