މިއަދު މާލެއިން ކޮވިޑް19 އަށް ޕޮޒިޓިވްވި މީހާއާ ޑައިރެކްޓު ކޮންޓެކްޓުވެ ކޮވިޑް19 އަށް ޕޮޒިޓިވްވީ ކުޑަ ކުއްޖެއް ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ އިން ބުނީ މިރޭ ކޮވިޑް19 އަށް ޕޮޒިޓިވްވީ ކުޑަ ކުއްޖެއް ކަމަށެވެ. ނަމަވެސް އެކުއްޖާގެ އުމުރެއް އެޗްޕީއޭ އިން ހާމައެއް ނުކުރެއެވެ. އެނގިފައިވާ ގޮތުގައި އެ ކުއްޖާއަކީ ކޮވިޑް19 އަށް ޕޮޒިޓިވްވި މީހާގެ ދަރިފުޅެވެ.
އެޗްޕީއޭ އިން މިރޭ ބުނީ އެމީހާއާ ކޮންޓެކްޓުވި 11 މީހެއްގެ ސާމްޕަލް ނަގާފައިވާއިރު 10 މީހުންގެ ނަތީޖާ ނެގެޓިވް ކަމަށެވެ. މާލެއިން ޕޮޒިޓިވްވި މީހާ ކޮވިޑް19 އަށް ޕޮޒިޓިވްވިކަން އެނގުނީ އަލާމާތްތަކެއް ހުރެގެން މާލޭގައި ހުންނަ ފްލޫ ކްލިނިކަށް ދެއްކުމުންނެވެ.
މިކަމާއި ގުޅިގެން މާލެއިން ގެއަކާއި އައްޑޫ ސިޓީ ހިތަދޫ ގެއެއް ވަނީ މޮނީޓަރިންގެ ހާލަތަކަށް ގެނެސްފައެވެ. މީގެއިތުރުން މިކަމާއި ގުޅިގެން އެޗްޕީއޭ އިން ވަނީ މާލެ ކޮވިޑް19 ގެ ލެވެލް ރަތަށް ބަދަލުކޮށްފައެވެ. އެ ލެވަލް އަކީ ޓްރެވަލް ހިސްޓްރީއެއް ނެތި މީހުންގެ މެދުގައި ބަލި ފެތުރުމެވެ.