މާލެއިން ކޮވިޑް19 އަށް މާލެއިން ހަތްވަނަ މީހަކު ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ކޮށްފައިވާ ޓްވީޓެއްގައި ބުނީ ކޮވިޑް19 އަށް ޝައްކު ކުރެވޭ އަލާމާތްތަކެއް ހުރި ދިވެއްސަކު އެ ބައްޔަށް ޕޮޒިޓިވްވެފައިވާ ކަމަށެވެ. މިއީ، މާލެއިން މި ބައްޔަށް ޕޮޒިޓިވްވި ހަވަނަމީހާއެވެ. އަދި މުޅި ރާއްޖެއިން މިހާތަނަށް މި ބައްޔަށް ޕޮޒިޓިވްވި 27ވަނަ މީހާއެވެ.
ރާއްޖެއިން ކޮވިޑް19 އަށް މިހާތަނަށް ޕޮޒިޓިވްވެފައިވާ 27 މީހުންގެ ތެރެއިން ބައްޔަށް ޕޮޒިޓިވްވި ދިވެހިންގެ އަދަދު މި ބައްޔަށް ރާއްޖެއިން ޕޮޒިޓިވްވި ބިދޭސީންނާއި ގާތްގަނޑަކަށް އެއްހަމަ ވަނީއެވެ. ރާއްޖެއިން މިހާތަނަށް މި ބައްޔަށް ޕޮޒިޓިވްވި އެންމެ ގިނަ މީހުންނަކީ ބިދޭސީންނެވެ. އެއީ 15 ބިދޭސީންނެވެ. އޭގެތެރެއިން ދެ މީހުންނަށް ބަލި ޖެހުނުކަން އެނގުނީ ރާއްޖެއިން ފުރައިގެން ދިޔަ ފަހުންނެވެ. އަދި ބާކީ ތިބި 13 ބިދޭސީން ވަނީ މި ބަލިން އެއްކޮށް ރަނގަޅުވެފައެވެ.
މި ބައްޔަށް ޖުމްލަ 11 ދިވެއްސަކު ޕޮޒިޓިވްވިިއިރު މި ބަލިން މިހާތަނަށް ރަނގަޅުވެފައި ވަނީ ތިން ދިވެހިންނެވެ. މާލެއިން އެންމެ ފުރަތަމަ މި ބައްޔަށް މީހަކު ޕޮޒިޓިވްވެފައި ވަނީ މިދިޔަ ބުދަ ދުވަހުއެވެ. އެމީހާ ކޮވިޑް19 އަށް ޕޮޒިޓިވްވުމާއި ގުޅިގެން މާލެ ސިޓީ ވަނީ މިދިޔަ ބުދަ ދުވަހު 24 ގަޑިއިރަށް ލޮކްޑައުންވެސް ކޮށްފައެވެ. އަދި އިއްޔެ ލޮކްޑައުންގެ ވަގުތު ހަމަވުމުން ޑިރެކްޓަރު ޖެނެރަލް އޮފް ޕަބްލިކް ހެލްތު ވަނީ އިތުރު 24 ގަޑިއިރަށް މާލެ ސިޓީ ލޮކްޑައުން ކޮށްފައެވެ. މީގެއިތުރުން ރޭގެ ވަގުތެއްގައި ވަނީ އެއްރަށުން އަނެއް ރަށަށް މީހުން ދިއުންވެސް އެއްކޮށް މަނާ ކޮށްފައެވެ.