ކޮވިޑް19 އަށް މާލެއިން މިއަދު ޕޮޒިޓިވްވި ބަންގްލަދޭޝް މީހާއަކީ ދިވެއްސަކާއި އިނދެގެން އުޅޭ މީހެއްކަން "އައްޑޫލައިވް" އަށް އެނގިއްޖެއެވެ.
ނަން ހާމަކުރަން ބޭނުންނުވާ ހެލްތު ޕްރޮޓެކްޝަން އެޖެންސީގެ (އެޗްޕީއޭ)ގެ އިސް އޮފިޝަލަކު "އައްޑޫލައިވް" އަށް މިއަދު ވިދާޅުވީ ޕޮޒިޓިވްވި ބަންގްލަދޭޝް މީހާއަކީ ދިވެއްސަކާއި އިނދެގެން އުޅޭ މީހެއް ކަމަށާއި އޭނާ ދިރިއުޅެނީ ވެސް އަނބިމީހާއާ އެކީ އެގޭގައި ކަމަށެވެ. އަދި އޭނާއަކީ ރާއްޖޭގައި އުޅޭ އެހެން ބަންގްލަދޭޝް މީހުންނާއި އެކުގައި އާއްމުކޮށް އުޅޭ މީހެއް ނޫން ކަމަށްވެސް އޮފިޝަލް ވިދާޅުވިއެވެ.
މި މީހާއަކީ މާލެއިން މި ބައްޔަށް ފުރަތަމަ ޕޮޒިޓިވްވި ބަންގްލަދޭޝް މީހާއެވެ. ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނީ ކޮވިޑް19 އަށް ޕޮޒިޓިވް ވި ދިވެއްސެއްގެ (ކޭސް 30) ގެ ޑައިރެކްޓް ކޮންޓެކްޓެވި ބަންގްލަދޭޝް މީހެއްގެ ބަލީގެ އަލާމާތްތައް ފެނި، ހެދި ޓެސްޓުގެ ނަތީޖާ ޕޮޒިޓިވްވެފައިވާ ކަމަށެވެ. މިއީ، މާލެއިން މި ބައްޔަށް ޕޮޒިޓިވް ވި ބާރަވަނަ މީހާއެވެ. އަދި މި މީހާ އައިސޮލޭޝަން ފެސިލިޓީއެކަށް ގެންދިއުމުގެ މަސައްކަތް ދަނީ ކުރެވެމުން ކަމަށް އެޗްޕީއޭ އިން ބުންޏެވެ.
މާލެއިން 12 މީހަކު ކޮވިޑަށް ޕޮޒިޓިވް ވެފައިވާއިރު، ރާއްޖެއިން މި ބައްޔަށް ޕޮޒިޓިވްވި ޖުމްލަ މީހުންގެ އަދަދު މިހާރު ވަނީ 32 އަށް އަރާފައެވެ. މީގެތެރެއިން 16 މީހަކު ވަނީ ބަލިން ރަނގަޅުވެފައެވެ.
މާލެއިން މިދިޔަ ބުދަ ދުވަހު ފުރަތަމަ ފަހަރަށް ކޮވިޑް-19 އަށް މީހަކު ޕޮޒިޓިވްވުމާ ގުޅިގެން، ފާއިތުވި ދެ ދުވަހު މާލެ ސަރަހައްދު އޮތީ 24 ގަޑިއިރުގެ ލޮކްޑައުންގެ ހާލަތުގައެވެ. ނަމަވެސް އެ މުއްދަތު 14 ދުވަހަށް އިތުރުކުރަން އެޗްޕީއޭ އިން އިއްޔެ ވަނީ ނިންމާފައެވެ.