މިއަދު މާލެއިން ކޮވިޑް19 އަށް ޕޮޒިޓިވްވި އިންޑިއާގެ ދެ މީހުން އެ ބައްޔަށް ޕޮޒިޓިވްވި ނަމަވެސް އެ ދެމީހުންގެ ގައިން ބަލީގެ އެއްވެސް އަލާމާތެއް ފެނިފައި ނުވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ޑޮކްޓަރު ނަޒްލާ ރަފީގު ވިދާޅުވެއްޖެއެވެ.
ދަރުބާރުގޭގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑރ. ނަޒްލާ ވިދާޅުވީ އެ ދެ މީހުންނަކީ ކޮވިޑް19 އަށް މާލެއިން ޕޮޒިޓިވްވި ކޭސް 28 އާ ގުޅުންހުރި [ކޮންޓެކްޓުވެ، ހައި ރިސްކު ކެޓަގަރީގައި ތިބި] ދެ މީހުން ކަމަށެވެ. ކޭސް 28އަކީ މިދިޔަ ހުކުރު ދުވަހު ކޮވިޑް19 އަށް ޕޮޒިޓިވްވި ދިވެއްސެކެވެ.
އެ ދެ މީހުންނަކީ ބްރައިޓު ބްރަދާސްގައި މަސައްކަތް ކުރާ އޭސީ މަރާމާތު ކުރާ ދެ ޓެކްނީޝަނުން ކަމަށްވެސް ޑރ. ނަޒްލާ ވިދާޅުވިއެވެ. ޑރ. ނަޒްލާ ވިދާޅުވީ އެ ދެ މީހުން އޭސީ މަރާމާތު ކުރުމަށް ބައެއް ގެތަކަށް ގޮސްފައި އެބަހުރި ކަމަށެވެ.
"މި ދެ މީހުންވެސް ކޭސް 28 ދިޔަ ތަންތަނުގެ އިތުރަށް އެހެން ތަނަކަށް ގޮސްފައިވާ ނަމަ އެމީހުންވެސް އަޅުގަނޑުމެން ބަލަމުން ގެންދާނަން،" ޑރ. ނަޒްލާ ވިދާޅުވިއެވެ.
އިންޑިއާގެ ދެ މީހުންގެ ގައިން ކޮވިޑް19 ފެނިފައިވާއިރު ބަންގްލަދޭޝް އަށް ނިސްބަތްވާ ޖުމްލަ 14 ބިދޭސީއަކަށް މިއަދު ވަނީ ކޮވިޑް19 ޖެހިފައެވެ. އޭގެތެރެއިން އެކަކަކީ ދާދިފަހުން ތޮއްޖެހިފައިވާ ތަންތަނުގައި ދިރިއުޅެމުން ދިޔަ މީހުން ހުޅުމާލޭގައި ގާއިމް ކޮށްފައިވާ ތަންތަަނަށް ބަދަލުކުރިއިރު ހިމެނޭ މީހެކެވެ. ބާކީ ތިބި 13 މީހުންނަކީ ލިލީ ސްޓޯރުގައި މަސައްކަތް ކުރާ 13 މީހުންނެވެ. މާލެއިން ކޮވިޑް-19 އަށް ޕޮޒިޓިވްވީ މީހުންގެ އަދަދު މިހާރު ވަނީ 31 އަށް އަރާފައެވެ. އެއީ 14 ދިވެހިންނާއި 17 ބިދޭސީންނެވެ.