ރާއްޖެއިން ކޮވިޑް19 އަށް ޕޮޒިޓިވްވާ މީހުންގެ ފޮޓޯ ސޯޝަލް މީޑިއާގައި އާއްމު ކުރާނަމަ އެފަދަ އަމަލުތައް ކުރާ ފަރާތްތަކުގެ މައްސަލަ ފުލުހުންނަށް ހުށަހަޅާނެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ޑޮކްޓަރު ފާތިމަތު ނަޒްލާ ރަފީގު ވިދާޅުވީ ކޮވިޑް19 އަށް ޕޮޒިޓިވްވެފައިވާ މީހުން ކަމަށްބުނެ ބައެއް މީހުންގެ ފޮޓޯތައް ސޯޝަލް މީޑިއާގައި އާއްމު ކުރަމުން އަންނަ ކަމަށެވެ. އަދި އެއީ އެއްވެސް މީހަކު ކޮށްގެން ވާނެ ކަމެއް ނޫންކަން ފާހަގަކުރައްވާ ޑރ. ނަޒްލާ ވިދާޅުވީ އެޗްޕީއޭ އަށްވެސް މީހުންގެ ފޮޓޯއާ މައުލޫމާތުތައް ހާމަ ކުރެވެނީ ގާނޫނުގައި ބުނާ އިޖުރާއަތްތައް ފުރިހަމަ ކުރުމަށްފަހު ކަމަށެވެ.
"އާއްމު ސިއްހަތު ރައްކާތެރިކުރުމުގެ ގާނޫނުގެ ދަށުން ގަވާއިދެއް ހަދައިގެން އޭގެ ދަށުން އަޅުގަނޑުމެންނަށްވެސް ބަލި މީހާގެ މައުލޫމާތު ހާމަކުރެވޭނީ. އެގޮތަށް ހާމަކުރުމުގެ ބާރު ލިބިވަޑައިގަންނަވަނީ ޕަބްލިކް ހެލްތްގެ ޑިރެކްޓަރު ޖެނެރަލަށް. އެހެން މީހުން އެކަން ކޮށްފިއްޔާ އެމީހަކު އެ ކުރަނީ ކުށެއް. އަޅުގަނޑުމެންނަށް އެކަން ފެންނަ ކަމަށްވަންޏާމު އަޅުގަނޑުމެން އެކަން ޕޮލިހަށް އަންގަމުން ދާނަން." ޑރ.ނަޒްލާ ވިދާޅުވިއެވެ.
މުޅި ރާއްޖެއިން މިހާރު ކޮވިޑް19 އަށް ވަނީ 52 މީހަކު ޕޮޒިޓިވްވެފައެވެ. މިއަދު ވެސް ދިވެއްސަކު ވަނީ ކޮވިޑް19 ޕޮޒިޓިވްވެފައެވެ. އެމީހާ ޕޮޒިޓިވްވީ ހއ. އުލިގަމުންނެވެ. މިއަދަކީ އެންމެ ގިނައިން ރާއްޖެއިން ކޮވިޑް19 އަށް މީހުން ޕޮޒިޓިވްވި ދުވަހެވެ. މާލެއިން އެކަނިވެސް މިއަދު 16 މީހަކު ކޮވިޑް19 އަށް ވަނީ ޕޮޒިޓިވްވެފައެވެ.