ކޮވިޑް19 މާލެއިން ފެނުމާއި ގުޅިގެން މާލެ ސިޓީ ލޮކްޑައުން ކޮށްފައި އޮތް ނަމަވެސް، އަތޮޅުތަކުން މާލެއަށް މުދާ ބަލާ އަންނަ ބޯޓުތަކަށް މާލެ އާދެވޭނެ ކަމަށް ފުލުހުން ބުނެފިއެވެ.
މިދިޔަ ހަފްތާގެ ބުދަ ދުވަހުން ފެށިގެން މާލެ ސިޓީ ވަނީ ލޮކްޑައުން ކޮށްފައެވެ. އެހެންކަމުން މާލެ ސަރަހައްދުގެ އެއްވެސް ބަނދަރެއްގައި އޮތް ބޯޓަކަށް ފުރުން ވަނީ މަނާކޮށްފައެވެ. އަދި އެއިން ބަނދަރަކަށް ބޯޓެއް އެތެރެވުމަކީ ވެސް މަނާ ކަމެކެވެ.
"އަތޮޅުތަކުން ޒަރޫރީ ބޭނުމަށް ގެންނަންޖެހޭ މުދާ ބަލާ މާލެ އާދެވޭނެ. ނަމަވެސް މި އުޅަނދުތަކުގައި ކައްޕި އާއި ފަޅުވެރިން ފިޔަވައި އިތުރު ބަޔަކަށް ދަތުރު ނުކުރެވޭނެ. ދަތުރުކުރައްވާއިރު ރަށްރަށުގެ ޓާސްކް ފޯސްގެ ބެއްލެވުމުގެ ދަށުން ކުރިއަށް ގެންދެވުމަށް ދަންނަވަން،" ފުލުހުން ބުންޏެވެ.
މިކަމާއި ގުޅިގެން އެސިސްޓެންޓް ކޮމިޝަނަރު އޮފް ޕޮލިސް ފައިރޫޝް ވިދާޅުވީ މާލެއަށް ބޯޓު ފަހަރުތަކުން ދަތުރު ފަށަންވާނީ ކައުންސިލްގެ ހުއްދަ ނަގައިގެން ކަމަށެވެ. އެއްވެސް މީހަކަށް މާލެއަށް ނޭރޭނެ ކަމަށާއި އަރުވަން ބޭނުންވާ މުދާ އެރުވޭނީ ދެކުނު ބަނދަރުން ކަމަށްވެސް ފައިރޫޝް ވިދާޅުވިއެވެ.