މިއަހަރު ބޭއްވުމަށް މީގެކުރިން ނިންމާފައި އޮތް ލޯކަލް ކައުންސިލް އިންތިހާބުގައި ވާދަކުރާ 26 މުވައްޒަފެއްގެ އިންޓާނަލް ސަސްޕެންޝަން ފެނަކަ ކޯޕަރޭޝަން އިން އުވާލައިފިއެވެ.
ފެނަކަ ކޯޕަރޭޝަނުން ކުރި ޓްވީޓެއްގައި ބުނީ ލޯކަލް ކައުންސިލް އިންތިހާބާިއ ގުޅިގެން އެކުންފުނީގެ އިންޓާނަލް ސަސްޕެންޝަންގައި ހުރި މުވައްޒަފުންގެ ސަސްޕެންޝަން އިއްޔެ އުވާލާފައިވާ ކަމަށެވެ.
ފެނަކައިން މިގޮތަށް މުވައްޒަފުންގެ ސަސްޕެންޝަން އުވާލާފައިވާއިރު މިއަހަރު ބޭއްވުމަށް ހަމަޖެހިފައި އޮތް ކައުންސިލް އިންތިހާބު ކޮވިޑް19 އާ ގުޅިގެން ބޭއްވިފައެއް ނުވެއެވެ. ފުރަތަމަ ކައުންސިލް އިންތިހާބު ބޭއްވުމަށް ނިންމާފައި އޮތީ މި މަހުގެ ހަތަރުވަނަ ދުވަހުއެވެ. އިލެކްޝަންސް ކޮމިޝަނުން ހުރިހާ ތައްޔާރީތަކެއްވެ ނިމިފައިވާއިރު ކޮވިޑް19 އާ ގުޅިގެން މިމަހުގެ 18ވަނަ ދުވަހަށް ކައުންސިލް އިންތިހާބު ފަސްކުރިއެވެ.
އެހެންނަމަވެސް ރާއްޖޭގައި ކޮވިޑް19 ފެތުރެން ފަށާފައިވުމާއި ގުޅިގެން ސިއްހީ ކުއްލި ނުރައްކަލުގެ ހާލަތުވެސް އިއުލާން ކުރުމާއި އެކު އިލެކްޝަންސް ކޮމިޝަނުން ނިންމީ ރާއްޖޭގައި އިންތިހާބެއް ބާއްވާނެ ފަދަ މާހައުލެއް ނެތް ކަމަށެވެ.
އެއާއި އެކު ރައްޔިތުން މަޖިލީހުގެ ސަރުކާރުގެ މެންބަރުންނާއި އިދިކޮޅު ޕީޕީއެމް އަދި ޕީއެންސީން ވެސް ވަނީ ކައުންސިލް އިންތިހާބުގައި ވާދަކުރާ ސިވިލް ސާވިސް މުވައްޒަފުންގެ ސަސްޕެންޝަން އުވާލުމަށް ވަނީ ގޮވާލައިފައެވެ. އެއާއެކު ސިވިލް ސާވިސް ކޮމިޝަނުން ވަނީ އެ މަސައްކަތް ކުރަމުން އަންނަ ކަމަށް ބުނެފައެވެ.