ހިތަދޫ ރީޖަނަލް ހޮސްޕިޓަލް، ކޮވިޑް-19 އަށް ހާއްސަ ހޮސްޕިޓަލެއްގެ ގޮތުގައި ތަރައްޤީ ކުރަމުން އަންނަކަމަށް ސަރުކާރުން ބުނެފިއެވެ.
ކޮވިޑް-19 އާއި ގުޅޭގޮތުން މައުލޫމާތު ދެއްވުމަށް މިއަދު މެންދުރު ބޭއްވި ނޫސް ކޮންފަރެންސްގައި "އައްޑޫލައިވް" އިން ކުރި ސުވާލަކަށް ޖަވާބު ދެއްވަމުން ކޮވިޑް-19 ތަރުޖަމާނު މަބްރޫކު އަޒީޒު ވިދާޅުވީ އައްޑޫގައި ކޮވިޑް-19ގެ ކަންކަމަށް ހާއްސަ ކުރަނީ ކުރީގެ ހިތަދޫ ރީޖަނަލް ހޮސްޕިޓަލް (އެޗްއާރުއެޗް) އިމާރާތް ކަމަށެވެ.
މަބްރޫކު ވިދާޅުވީ އެޗްއާރުއެޗްގައި 23 އައިސީޔޫ އެނދާއި، 22 އައިސޮލޭޝަން އެނދު ތައްޔާރު ކުރުމުގެ މަސައްކަތް ކުރަމުން އަންނަ ކަމަށެވެ.
"މިހާރު ހުރި ހޮސްޕިޓަލް އިމާރާތަށް މާ ބޮޑު ބަދަލެއް ނުގެނެސް ހޮސްޕިޓަލް ތަރައްޤީ ކުރުމުގެ މަސައްކަތް ދަނީ" މަބްރޫކު ވިދާޅުވިއެވެ.
އެޗްއާރުއެޗް ކޮވިޑް-19ގެ ބޭނުން ކުރުމަށް ނިންމި އިރު އެ ހޮސްޕިޓަލުން މީގެ ކުރިން ދެމުން ދިޔަ ހުރިހާ ހިދްމަތެއް ވަނީ އައްޑޫގައި އަލަށް ހެދި 100 އެނދުގެ ޓާޝަރީ ހޮސްޕިޓަލް، އައްޑޫ އިކުއިޓޯރިއަލް ހޮސްޕިޓަލަށް ބަދަލުކޮށްފައެވެ.
މާލެއިން ކޮވިޑް-19ގެ ގިނަ ކޭސްތަކެއް ފެނިފައިވާއިރު އެކޭސް ތަކާއި ގުޅިގެން ބައެއް މީހުންގެ ސާމްޕަލްތައް ވަނީ ނަގާފައެވެ. އަދި އެގޮތަށް މިހާތަނަށް ނެގި ހުރިހާ ސާމްޕަލްތަކެއް ނެގެޓިވް ވެފައިވާކަމަށް އައްޑޫ ޓާސްކްފޯސް ޑެސްކުންވަނީ ބުނެފައެވެ.
އައްޑޫގައި ކޮވިޑް-19 އަށް ޓެސްޓު ކުރެވެން ނެތުމުން ސާމްޕަލް ޖެހެނީ މާލެ ފޮނުވާށެވެ. އަދި މިހާރު މޯލްޑިވިއަންގެ ދަތުރުތައް މެދުކަނޑާލައިފައި އޮތުމުން ސާމްޕަލް މާލެ ގެންދަނީ މޯލްޑިވިއަންގެ ޗާޓަރު ފްލައިޓުތަކުގައެެވެ.
ސަރުކާރުން ވަނީ ވަރަށް އަވަހަށް އައްޑޫން ޓެސްޓު ހެދެން ފެށޭނެ ކަމަށް ބުނެފައެވެ. ނަމަވެސް ސީދާ ވަކި ދުވަހެއް ހާމަކޮށްފައި ނުވެއެވެ.