އެކަހެރިވާން އަންގާފައި ވަނިކޮށް ގެއިން ބޭރުގައި އުޅުނު މީހަކު ހައްޔަރުކޮށްފިއެވެ.
ފުލުހުން މިރޭ ބުނީ އެއް ރަށުން އަނެއް ރަށަށް މީހުން ދަތުރު ކުރުން މަނާކޮށްފައި ވަނިކޮށް އަދި ގެއިން ބޭރަށް ނިކުތުން މަނާކޮށްފައި ވަނިކޮށް ކ. ގާފަރުން ބޭރަށް ނުކިތް 27 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށެވެ. އޭނާ ހައްޔަރުކުރީ ކޯޓު އަމުރެއްގެ ދަށުންނެވެ.
އެކަހެރިވާން އަންގާފައި ވަނިކޮށް ގެއިން ބޭރަށް ނިކުތް މީހަކު ހައްޔަރުކޮށްފައިވާއިރު އިއްޔެ ވަނީ ކުޅުދުއްފުއްޓަށް އެރި މީހަކު ވެސް ހައްޔަރުކޮށްފައެވެ. އަދި މިއަދު ވަނީ ގެމަނަފުށިން ކޮނޑޭއަށް ދިޔަ މީހަކު ހައްޔަރުކޮށްފައެވެ.
އެއް ރަށުން އަނެއް ރަށަށް މި ދުވަސްވަރު އަރައި ފޭބުން މަނާކޮށްފައިވާއިރު، ފުލުހުން ވަނީ މި ނާޒުކު ދަނޑިވަޅުގައި ހުރިހާ ފަރާތްތަކަކުން ވެސް ޑިރެކްޓާ ޖެނެރަލް އޮފް ޕަބްލިކް ހެލްތުގެ އެންގެވުމާ އެއްގޮތަށް އަމަލުކުރުމަށް އިލްތިމާސްކޮށްފައެވެ.