ދިވެހި ގައުމުގެ އިސްތިގުލާލާއި މިނިވަންކަން ދެމެހެއްޓުމަށް ސިފައިން ކޮށްދެއްވަމުން އަންނަ ބުރަ މަސައްކަތަށް ރައީސުލްޖުމްހޫރިއްޔާ އަދި ސިފައިންގެ އެންމެ އިސްވެރިޔާ އިބްރާހީމް މުހައްމަދު ސޯލިހު ޝުކުރު އަދާ ކުރައްވައިފިއެވެ.
ސިފައިންގެ 128ވަނަ އަހަރީ ދުވަހުގެ މުނާސަބަތުގައި ރައީސުލްޖުމްހޫރިއްޔާ ކުރެއްވި ޓްވީޓުގައި ވިދާޅުވެފައިވަނީ ސިފައިންގެ 128 ވަނަ އަހަރީ ދުވަހުގެ ތަހުނިޔާއާއި މުބާރިކްބާދީ ހުރިހާ ސިފައިންނަށް އަރިސްކުރާ ކަމަށެވެ. ދިވެހިރާއްޖޭގެ އިސްތިގުލާލާއި މިނިވަންކަން ދަމަހައްޓައި ރައްޔިތުންގެ ރައްކާތެރިކަމަށް ކޮށްދެއްވާ އަގުހުރި މަސައްކަތަށް އިހުލާސްތެރި ޝުކުރެއް ދަންނަވާ ކަމަށެވެ.
ސިފައިންގެ 128 ވަނަ އަހަރީ ދުވަހުގެ ތަހުނިޔާއާއި މުބާރިކްބާދީ ހުރިހާ ސިފައިންނަށް އަރިސްކުރަން. ދިވެހިރާއްޖޭގެ އިސްތިޤްލާލާއި މިނިވަންކަން ދަމަހައްޓައި ރައްޔިތުންގެ ރައްކާތެރިކަމަށް ކޮށްދެއްވާ ތިޔަ އަގުހުރި މަސައްކަތަށް އިޚްލާސްތެރި ޝުކުރު ދަންނަވަން.
— Ibrahim Mohamed Solih (@ibusolih) April 21, 2020
މިއަހަރުގެ ސިފައިންގެ އަހަރީ ދުވަސް ދިމާވެފައި މިވަނީ ކޮވިޑް19 ގެ ސަބަބުން ދަތި އަދި އުނދަގޫ ހާލަތެއްގައި ދިވެހިން ވަނިކޮށެވެ. މި ހާލަތުގައި ސިފައިން އަންނަނީ ގިނަގުނަ އެހީތެރިކަމެއް ރައްޔިތުންނަށް ފޯރު ކޮށްދެމުންނެވެ. ރެއާއި ދުވާލު ވާރެއާ އަވީގައި ދިވެހި ރައްޔިތުންނަށް ސިފައިން ދެމުން އަންނަ ހިދުމަތް ދިވެހި ރައްޔިތުން ބަލައިގަންނަނީ ހެޔޮ ހިތުންނެވެ.