ކެނެޑާގެ ނޯވާ ސްކޯޝިއާގައި މީހަކު ބަޑިން ހަމަލާދީ ކުށެއް ނެތް އާއްމުންގެ ގިނަ ބަޔަކު މަރާލުމާ ގުޅިގެން އެޤައުމުގެ ޚާރިޖީ ވަޒީރު ފްރަންސްވާ-ފިލިޕް ޝެމްޕޭންއަށް ފޮރިން މިނިސްޓަރު އަބްދުﷲ ޝާހިދު ހަމްދަރުދީގެ މެސެޖެއް ފޮނުއްވައިފިއެވެ.
މިނިސްޓަރ ޝާހިދު އިއްޔެ ކެނެޑާގެ ފޮރިން މިނިސްޓަރަށް ފޮނުއްވައި މެސެޖްގައި ވިދާޅުވީ ގިނަ ބަޔަކު މަރުވެ، އެތައް ބަޔަކު ޒަޚަމްވި އެ ހަމަލާގެ އަޑު އެއްސެވީ ކުއްލި ހައިރާންކަމާ، ފުން ހިތާމަޔާއެކުގައި ކަމަށެވެ. އަދި ހިތާމައިގެ މިދަނޑިވަޅުގައި ދިވެހި ރައްޔިތުންނާ، ސަރުކާރާއި އަދި އެމަނިކުފާނުގެ އަމިއްލަ ނަންފުޅުގައި، ހަމަލާގައި މަރުވި މީހުންގެ އާއިލާތަކަށް ތައުޒިޔާ ވިދާޅުވެ، ޒަޚަމްވި މީހުންނަށް އަވަސް ޝިފާއަކަށް އެދިވަޑައިގަންނަވާކަމަށް މިނިސްޓަރ ޝާހިދުގެ މެސެޖްގައި ވިދާޅުވިއެވެ.
މިއީ ފަހުގެ ތާރީޚެއްގައި ކެނެޑާގައި ދެވުނު މިފަދަ އެންމެ ނުރައްކާތެރި ހަމަލާއެވެ. ފުލުހުންގެ ޔުނިފޯމެއް ލައިގެން ހުރި މީހަކު ނޯވާ ސްކޯޝިއާގެ އެކި ސަރަހައްދުތަކުގައި ކާރުގައި ދަތުރުކޮށް ބަޑިން ހަމަލާ ދީފައިވާއިރު ބައެއް ގެތަކުގައި ރޯކޮށްލާފައިވެސްވެއެވެ.