މިއަހަރު ބޭއްވުމަށް ހަމަޖެހިފައި އޮތް ލޯކަލް ކައުންސިލް އިންތިހާބުގައި ވާދަ ކުރުމަށް ނިންމާފައިވާ ސިވިލް ސާވިސް މުވައްޒަފުންގެ ސަސްޕެންޝަންއާ ގުޅޭ މައްސަލަ ހައްލު ކުރުމަށް ހައިކޯޓަށް މައްސަލަ ހުށަހަޅައިފިއެވެ.
އެކަމާ ގުޅިގެން ސިވިލް ސާވިސް ކޮމިޝަން އިން ރޭ ބުނެފައި ވަނީ ސިވިލް ސާވިސްގެ މުވައްޒަފުންގެ ސަސްޕެންޝަންގެ މައްސަލައަށް ހައްލެއް ހޯދުމަށް ތަފާތު މަސައްކަތްކުރަމުން ގެންދާ ކަމަށެވެ. އެ ކޮމިޝަނުން ބުނެފައިވަނީ މައްސަލައަށް އަވަސް ހައްލެއް ހޯދޭނެ ގޮތްތައް ދެނެގަތުމަށްޓަކައި ފޯނު ކޮންފަރެންސް މެދުވެރިކޮށް އިލެކްޝަން ކޮމިޝަނާ ވަނީ ބައްދަލުކޮށްފައި ކަމަށެވެ.
ލޯކަލް ކައުންސިލް އިންތިހާބު އެންމެ ފުރަތަމަ ބޭއްވުމަށް ހަމަޖެހިފައި އޮތީ މި މަހުގެ ހަތަރުވަނަ ދުވަހުއެވެ. އެހެންނަމަވެސް ފަހުން މި މަހުގެ 18ވަނަ ދުވަހު އިންތިހާބު ފަސް ކުރިއެވެ. ނަމަވެސް ރާއްޖެއިން ކޮވިޑް19 ފެނިފައިވުމާއި ގުޅިގެން ސަރުކާރުން އާއްމު ސިއްހަތުގެ ކުއްލި ނުރައްކަލުގެ ހާލަތު ރާއްޖޭގައި އިއުލާން ކުރިއެވެ. އެއާއި އެކު އިލެކްޝަންސް ކޮމިޝަނުން ވަނީ ރާއްޖޭގައި އިންތިހާބެއް ބާއްވާނެ ހާލަތެއް ނެތް ކަމަށް ނިންމާ އިންތިހާބު ފަސްކޮށްފައެވެ.
އެއާއި އެކު އިންތިހާބު މުއްދަތެއް ނެތް ގޮތަށް ފަސް ކުރުމަށް ހައިކޯޓަށް ދުސްތޫރީ މައްސަލައެއް ހުށަހަޅާފައެވެ. އަދި އެ މައްސަލަ ފަހުން އެ ކޯޓުން ނެގުމަށްފަހު ސުޕްރީމް ކޯޓަށް އެ މައްސަލަ އިލެކްޝަންސް ކޮމިޝަނުން ހުށަހެޅިއެވެ. އަދި އޭގެފަހުން މަޖިލީހުން އެކަމަށް ހައްލެއް ގެނެސްދޭނެ ކަމަށް ބުނުމުން ސުޕްރީމް ކޯޓުންވެސް އެ މައްސަލަ ވަނީ ނަގާފައެވެ. އަދި ސަރުކާރުން ވަނީ ކައުންސިލް އިންތިހާބު ފަސް ކުރުމާއި ގުޅޭ ހާއްސަ ބިލެއް މަޖިލީހަށް ހުށަހަޅާފައެވެ.