ސިންގަޕޫރުގެ ހޮޓެލް ޕްރޮޕަޓީސް ލިމިޓެޑް (އެޗްޕީއެލް)ގެ އޯނަރު އަދި ބިލިއަނަރު އޮންގް ބެންގް ސެންގް ރާއްޖެއަށް 15 ވެންޓިލޭޓަރު ހަދިޔާކޮށްފިއެވެ.
ފޮރިން މިނިސްޓްރީގެ ކޮމިއުނިކޭޝަން ޑިރެކްޓަރު މިއުވާން މުހައްމަދު ވަނީ މިކަން "އައްޑޫލައިވް"އަށް ކަށަވަރު ކޮށްދީފައެވެ. އެގޮތުން އޮންގް ވަނީ 15 ވެންޓިލޭޓަރާއި 100،000 ފޭސް މާސްކް ރާއްޖެއަށް ހަދިޔާ ކޮށްފައެވެ. އެތަކެތި މިހާރުވަނީ ސިންގަޕޫރުގައި ހުންނަ ރާއްޖޭގެ އެމްބަސީއާ ހަވާލުވެސް ކޮށްފައެވެ.
މީގެއިތުރުން ވެސް ސިންގަޕޫރުގެ އިތުރު ކުންފުންޏަކުން ރާއްޖެއަށް 5000 ޓެސްޓު ކިޓު ހަދިޔާ ކޮށްފައިވާ ކަމަށްވެސް ފޮރިން މިނިސްޓްރީން ބުންޏެވެ.
އޮންގް ހަދިޔާކުރި ވެންޓިލޭޓަރުތަކުގެ ސަބަބުން ސަރުކާރުން ވެންޓިލޭޓަރު ހޯދުމަށް ކުރަމުން ގެންދާ މަސައްކަތްތަކަށް ބޮޑު ލުޔެއް ލިބިގެންދާނެއެވެ. ސަރުކާރުން މިހާރުވެސް ވަނީ 135 ވެންޓިލޭޓަރާއި 14 ޓްރާންސްޕޯޓެބަލް ވެންޓިލޭޓަރު ހޯދަމުގެ މަސައްކަތް ކުރަމުންނެވެ.
ސަރުކާރުން ދާދިފަހުން ވަނީ އޭގެތެރެއިން ހަ ޓްރާންސްޕޯޓެބަލް ވެންޓިލޭޓަރު މިހާތަނަށް ލިބިފައިވާ ކަމަށް ބުނެފައެވެ. މިހާރު ރާއްޖޭގައި ހުރީ 97 ވެންޓިލޭޓަރެވެ.