ކޮވިޑް19 ގެ ސަބަބުން ރާއްޖޭގެ އިގްތިސޯދީ ހާލަތުން އަރައިގަތުމަށްޓަކައި މަރުކަޒީ ބޭންކް އެމްއެމްއޭ އިން ދިގު މުއްދަތަކަށް ލޯނު ނެގުމަށް ސަރުކާރުން ނިންމައިފިއެވެ.
ފިނޭންސް މިނިސްޓަރު އިބްރާހީމް އަމީރު ސޮއި ކުރައްވާ މަޖިލީހަށް ވަނީ ސިޓީއެއް ފޮނުވާފައެވެ. އެ ސިޓީގައި ދައުލަތުގެ ހަރަދަށް ޒިންމާވާގޮތަށް ގާނޫނުގައި އޮންނަ މާއްދާ އަށް އަމަލު ކުރުން އެއް އަހަރަށް ލަސްކޮށް ދިނުމަށް ވަނީ އެދިވަޑައިގެންފައެވެ.
އެ ސިޓީގައި ދައުލަތުގެ ހަރަދަށް ޒިންމާވާގޮތަށް ގާނޫނުގައި އޮންނަ މާއްދާ އަށް އަމަލުކުރުމަކީ ފިނޭންސް މިނިސްޓްރީން އެކަމަކަށް އަމަލުކުރުން ލާޒިމް ކަމެއްގެ ގޮތުގައި ބަޔާންކޮށްފައިވީ ނަމަވެސް ރާއްޖޭގެ މިހާރުގެ ހާލަތު ހުރި ގޮތުން މި ދަނޑިވަޅުގައި އެކަމަކީ ކުރެވިދާނެ ކަމެއް ކަމަށް ގަބޫލު ނުކުރެވޭ ކަމަށް ވަނީ ވިދާޅުވެފައެވެ. އެ ގާނޫނުގައި ބުނާ ގޮތަށް މިހާރުގެ ހާލަތުގައިވެސް އަމަލު ކުރާ ކަމަށްވާ ނަމަ ދައުލަތުގެ ކޭޝް ފްލޯ މެނޭޖު ކުރުމަށާއި އިގްތިސޯދަށް ނޭދެވޭ އަސަރުތައް ކުރާނެ ކަމަށް މިނިސްޓަރު އަމީރު ވަނީ ވިދާޅުވެފައެވެ.
އެ ގާނޫނުގައި ބުނެފައިވަނީ އެމްއެމްއޭއިން ދައުލަތަށް ދަރަންޏަށް ފައިސާ ދޫކުރެވިދާނެ ކަމަށެވެ. ނަމަވެސް އެ ނަގާ ފައިސާއެއް 91 ދުވަހުގެ ތެރޭގައި ދައްކަން ޖެހޭނެއެވެ. އެހެންކަމުން ފިނޭންސް މިނިސްޓަރު ވަނީ އެ މުއްދަތަށް އަމަލުކުރަން ފަސް ކޮށްދިނުމަށް އެދިފައެވެ.