މާލެއިން ކޮވިޑް19 އަށް 9 މީހަކު ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ކޮށްފައިވާ ޓްވީޓެއްގައި މިއަދު ބުނީ މާލެއިން ބަންގްލަދޭޝް ފަސް މީހުންނާއި ހަތަރު ދިވެއްސަކު ކޮވިޑް19 އަށް ޕޮޒިޓިވްވެފައިވާ ކަމަށެވެ. މިއާއި އެކު މާލެއިން މި ބައްޔަށް ޕޮޒިޓިވްވި މީހުންގެ އަދަދު މިވަނީ 75 އަށް އަރާފައެވެ. އަދި މުޅި ރާއްޖެއިން މި ބައްޔަށް ޕޮޒިޓިވްވި މީހުންގެ އަދަދު މިވަނީ 95 އަށް އަރާފައެވެ.
މާލެއިން މި ބައްޔަށް އެންމެ ފުރަތަމަ މީހަކު ފެނުނީ މި މަހުގެ 15ވަނަ ދުވަހުއެވެ. ފްލޫ ކްލިނިކަކަށް ދެއްކި އެމީހާ ކޮވިޑް19 އަށް ޓެސްޓު ހެދުމުން ޕޮޒިޓިވްވިއެވެ. އަދި އެ ކޭސް އަށް ފަހު މާލެއިން ކޮވިޑް19 އަށް ޕޮޒިޓިވްވާ މީހުންގެ އަދަދު އަންނަނީ މަތިވަމުންނެވެ.
ޖުމްލަ 95 މީހަކު ރާއްޖެއިން ޕޮޒިޓިވްވިއިރު 16 މީހަކު ވަނީ ބަލިން ރަނގަޅުވެފައެވެ. އޭގެތެރޭގައި ތިން ދިވެހިންނާއި 13 ބިދޭސީން ހިމެނެއެވެ.