ކޮވިޑް-19 އަށް މިއަދު ޕޮޒިޓިވްވި މީހުންގެ ތެރޭގައި 4 އަހަރާއި 12 އަހަރުގެ ދެ ކުދިން ހިމެނޭކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
ނެޝަނަލް އިމެޖެންސީ އޮޕަރޭޝަން ސެންޓަރ (އެންއީއޯސީ) އިން މިރޭ ބޭއްވި ނޫސް ކޮންފަރެންސްގައި އައިޖީއެމްއެޗް ހޮސްޕިޓަލްގެ ޑރ. އަފްޒަލް ވިދާޅުވީ މިއަދު މާލެއިން ކޮވިޑް-19 އަށް ޕޮޒިޓިވް މީހުންގެ ތެރޭގައި 4 އަހަރުގެ ކުއްޖަކާއި 12 އަހަރުގެ ކުއްޖެއް ހިމެނޭކަމަށެވެ.
މި ގޮތުން މިއަދު ޕޮޒިޓިވްވި 4 އަހަރުގެ ކުއްޖާއަކީ ސްރީލަންކާއަށް ނިސްބަތްވާ ކުއްޖެކެވެ. މިކުއްޖާއަކީ "އެމްއެޗްއެފް" ކްލަސްޓާ އާއި ގުޅުންހުރި ތަނެއްގައި މަސައްކަތް ކުރާ މީހެއްގެ ދަރިއެއް ކަމަށެވެ.
މީގެ އިތުރުން މިއަދު ދެން ޕޮޒިޓިވްވި 12 އަހަރުގެ ކުއްޖާއަކީ ކޭސް 28 އާއި ކޭސް 31ގެ ދަރިފުޅެވެ. މިއީ ބީއާރުބީ ކްލަސްޓާއަށް ނިސްބަތްވާ ކުއްޖެއް ކަމަށް އަފްޒަލް ވިދާޅުވިއެވެ.
ރާއްޖެއިން ޕޮޒިޓިވްވި މީހުންގެ އަދަދު 128 އަށް އަރާފައިވާ ކަމަށެވެ.
ރާއްޖެއިން ޕޮޒިޓިވްވި މީހުންގެ ތެރޭގައި ހިމެނެނީ 60 ދިވެހިންނާއި 68 ބިދޭސީންނެވެ. ރާއްޖެއިން ޕޮޒިޓިވްވި މީހުންގެ ތެރެއިން 16 މީހަކު މިހާތަނަށް ވަނީ ބަލިން ރަނގަޅުވެފައެވެ.
ކޮވިޑް-19 އަށް ރާއްޖެއިން މިއަދު ހަ މީހަކު ޕޮޒިޓިވް ވެފައިވާކަން އެޗްޕީއޭ އިން މިއަދު މެންދުރު ވެސް ވަނީ އިއުލާންކޮށްފައެވެ. މި ހަ މީހުންގެ ތެރޭގައި ހިމެނެނީ ދިވެހިންގެ ދެ މީހުންނާއި ބަންގްލަދޭޝްގެ ދެ މީހުން އަދި ލަންކާ އިންނާއި އިންޑިޔާ މީހެކެވެ.
މިހާތަނަށް 5441 ސާމްޕަލް ހެދިފައިވާއިރު، 5071 ސާމްޕަލް ނެގެޓިވް ވެފައިވާކަމަށް މަބްރޫކް ވިދާޅުވިއެވެ.
މާލެއިން ގިނަ އަދަދަކަށް މީހުން ޕޮޒިޓިވް ވަމުން އަންނައިރު، މާލެ ސަރަހައްދު މިވަގުތު އޮތީ 14 ދުވަހުގެ މުއްދަތަކަށް ލޮކްޑައުންގެ ހާލަތުގައެވެ