ކޮވިޑް-19 އަށް ޕޮޒިޓިވްވެ ފަރުވާ ދެމުން ދިޔަ ދެ ދިވެއްސަކު ބަލިން ރަނގަޅުވެ ދޫކޮށްލާފައިވާކަމަށް ސަރުކާރުން ބުނެފިއެވެ.
ނެޝަނަލް އިމެޖެންސީ އޮޕަރޭޝަން ސެންޓަރ (އެންއީއޯސީ) އިން މިރޭ ބޭއްވި ނޫސް ކޮންފަރެންސްގައި ކޮވިޑް-19ގެ ތަރުޖަމާނު މަބްރޫކު އަޒީޒު ވިދާޅުވީ ރާއްޖެއިން ކޮވިޑަށް ޕޮޒިޓިވްވި މީހުންގެ ތެރެއިން ދެ މީހަކު ފަރުވާ ދިނުމަށްފަހު ބަލިން ފަސޭހަވެގެން ދޫކޮށްލާފައިވާ ކަމަށެވެ.
ފަރުވާއަށް ފަހު ދޫކޮށްލާފައިވަނީ ކޭސް 17 އަދި ކޭސް 19އެވެ.
މަބްރޫކު ވިދާޅުވީ ކޭސް 18 ވެސް ބަލިން ރަނގަޅުވެފައިވާ ކަމަށެވެ. އެގޮތުން ބަލި ރަނގަޅުވީތޯ ބެލުމަށް ހެދި ދެ ޓެސްޓު ނެގެޓިވްވެފައިވާ ކަމަށެވެ. ނަމަވެސް ކޭސް 18 ދޫކޮށްލާނީ އިތުރު 12 ދުވަހަށް ބެލުމަށް ފަހު ކަމަށެވެ.
ބަލިން ރަނގަޅުވެ ދޫކޮށްލި ދެމީހުންނަކީ އިނގިރޭސިވިލާތުން ރާއްޖެއައިސް ކަރަންޓީނުގައި ތިބި ދެމީހުންނެވެ. މި ދެމީހުން ބައްޔަށް ޕޮޒިޓިވްވެފައިވަނީ ކަަރަންޓީނުގެ މުއްދަތުގައި ބަލީގެ އަލާމާތް ހުރެގެން ހެދި ޓެސްޓުގެ ނަތީޖާ ޕޮޒިޓިވްވުމާއި ގުޅިގެންނެވެ.
މި ދެމީހުން ދޫކޮށްލުމާއި އެކު ރާއްޖެއިން މިބަލި ޖެހި ރަނގަޅުވި މީހުންގެ އަދަދު ވަނީ 18 އަށް އަރާފައެވެ.
ރާއްޖެއިން ޕޮޒިޓިވްވި މީހުންގެ އަދަދު 128 އަށް އަރާފައިވާ ކަމަށެވެ.
ރާއްޖެއިން ޕޮޒިޓިވްވި މީހުންގެ ތެރޭގައި ހިމެނެނީ 60 ދިވެހިންނާއި 68 ބިދޭސީންނެވެ. ރާއްޖެއިން ޕޮޒިޓިވްވި މީހުންގެ ތެރެއިން 16 މީހަކު މިހާތަނަށް ވަނީ ބަލިން ރަނގަޅުވެފައެވެ.
ކޮވިޑް-19 އަށް ރާއްޖެއިން މިއަދު ހަ މީހަކު ޕޮޒިޓިވް ވެފައިވާކަން އެޗްޕީއޭ އިން މިއަދު މެންދުރު ވެސް ވަނީ އިއުލާންކޮށްފައެވެ. މި ހަ މީހުންގެ ތެރޭގައި ހިމެނެނީ ދިވެހިންގެ ދެ މީހުންނާއި ބަންގްލަދޭޝްގެ ދެ މީހުން އަދި ލަންކާ އިންނާއި އިންޑިޔާ މީހެކެވެ.
މިހާތަނަށް 5441 ސާމްޕަލް ހެދިފައިވާއިރު، 5071 ސާމްޕަލް ނެގެޓިވް ވެފައިވާކަމަށް މަބްރޫކް ވިދާޅުވިއެވެ.
މާލެއިން ގިނަ އަދަދަކަށް މީހުން ޕޮޒިޓިވް ވަމުން އަންނައިރު، މާލެ ސަރަހައްދު މިވަގުތު އޮތީ 14 ދުވަހުގެ މުއްދަތަކަށް ލޮކްޑައުންގެ ހާލަތުގައެވެ