މި މަހުގެ 15ވަނަ ދުވަހު މާލެއިން ކޮވިޑް19 އަށް މީހަކު ޕޮޒިޓިވްވެ އެ ބަލި މާލެ ތެރޭގައި ހަލުވިކަމާއި އެކު ފެތުރެން ފަށާފައި ވާތީ އެކަން ތަހުގީގު ކުރުމަށް ގޮވާލައިފިއެވެ.
ރައްޔިތުން މަޖިލީހުގެ މިއަދުގެ ޖަލްސާގައި މަޑުއްވަރީ ދާއިރާގެ މެންބަރު އާދަމް ޝަރީފު ވާހަކަދައްކަވަމުން ވިދާޅުވީ މިވަގުތަކީ ހުރިހާ އެންމެނަށް ވެސް ހާސްކަން ބޮޑު ދުވަސްވަރެއް ކަމަށެވެ. އަދި މިއަދު މާލޭގައި ހަލުވިކަމާއި އެކުގައި ކޮވިޑް19 ފެތުރެން ފަށާފައި މިވާ ގޮތް އެނގެން އެންމެން ވެސް ބޭނުންވާ ކަމަށާއި އެކަން ހިނގައި ދިޔަ ގޮތުގެ ޖިނާއީ ތަހުގީގެއް ކުރިޔަށް ގެންދިއުމަށް އާދަމް ޝަރީފް ގޮވާލެއްވިއެވެ.
މާލޭގައި ކޮވިޑް19 ފެތުރެން ފެށިފަހުން މުޅި ރާއްޖޭގައި މި ބައްޔަށް ޕޮޒިޓިވްވި މީހުންގެ އަދަދު ދުވަހެއް ދުވަހަކަށް އަންނަނީ އިތުރުވަމުންނެވެ. އަދި ސަރުކާރުން އަންނަނީ ތަކުރާރުކޮށް އެކަމުގައި ސަރުކާރުން ދެމުން ގެންދާ އިރުޝާދުތައް ކަނުލާ އަޑުއަހާ އެކަމަށް ބޯލެނބުމަށް އިލްތިމާސް ކުރަމުންނެވެ.
އާދަމް ޝަރީފު ވިދާޅުވީ މި ހާލަތުގައިވެސް ރައްޔިތުންނަށް ބޭނުންވާ އަސާސީ ކާބޯތަކެތި ލިބިގެން ދާން ޖެހޭނެ ކަމަށެވެ. އަދި އެކަމަށް ބޭނުންވާ ތަކެތި ލިބިގެންދާކަން ދައުލަތުން ކަށަވަރު ކޮށްދޭން ޖެހޭނެ ކަމަށް އޭނާ ވިދާޅުވިއެވެ.
ދައުލަތުގެ ހިންގުމާއި އެކި ދާއިރާތަކުގެ ހިދުމަތްތައް ދިނުމަށްޓަކައި އެންމެ މަދުވެގެން 4.2 ބިލިއަން ރުފިޔާ ދައުލަތަށް ދިނުމަށް މަޖިލީހުން ވަނީ ފާސްކޮށްފައެވެ. މިނިސްޓަރު އަމީރު ވަނީ އެ ސިޓީއާ އެކުގައި ކޮވިޑް-19 އާ ގުޅިގެން އިގްތިސޯދީ އަދި މާލީ ލޮޅުމާއި އެކު ދައުލަތުގެ ހަރަދުތަކަށް ބޭނުންވާ ކޭޝް ފްލޯ ހޯދުމަށް މަޖިލީހަށް ލިޔުމެއް ފޮނުވާފައެވެ. އެ ލިޔުމުގައި މިނިސްޓަރު އަމީރު ވިދާޅުވީ ކުުރިއަށް އޮތް ތިން މަހަށް ދައުލަތުގެ ހިދުމަތްތައް ދަމަހައްޓައި، ސިއްހީ ހިދުމަތްތަކަށް ބޭނުންވާ ހޭދަތައްކޮށް، އިގްތިސާދީ ގޮތުން އާއިލާތަކަށް ބޭނުންވާ އަސާސީ ކަންކަން ފުއްދޭ މިންވަރު ކަށަވަރުކުރުމަށް އެންމެ މަދުވެގެން 4.2 ބިލިއަން ރުފިޔާގެ ފައިނޭންސިން ބޭނުންވާ ކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެއެވެ.
ކޮވިޑް19 ގެ ސަބަބުން ރާއްޖޭފެ ރިއަލް އިކޮނޮމީއާ އެހެން ދާއިރާތަކަށް އެކަމުގެ އަސަރުކޮށް އިގްތިސާދުގެ ޖުމުލަ ޑިމާންޑް ދަށްވާނެ ލަފާކުރެވޭ ކަމަށް މިނިސްޓަރު ވިދާޅުވިއެވެ. އެއާއެކު، ރާއްޖޭގެ އިގްތިސާދު 2020 ވަނަ އަހަރު 5.11 އިންސައްތައިން ދަށްވާނެ ކަމަށް ލަފާކޮށްފައިވެއެވެ.