ކޮވިޑް-19އަށް ފަރުވާ ދިނުމަށް ހުޅުމާލޭގައި ހަދާ މެޑިކަލް ފެސިލިޓީގައި މަސައްކަތް ކުރާ ދެ ބިދޭސީއަކު ކޮވިޑް-19 އަށް ޕޮޒިޓިވްވެއްޖެއެވެ.
ސިފައިންގެ ބެލުމުގެ ދަށުން ފެނަކަ ކޯޕަރޭޝަން އާއި ރާއްޖޭގެ ބައެއް ކޮންސްޓަރަކްޝަން ކުންފުނިތަކުގެ އެހީގައި ހަދަމުން އަންނަ މި ފެސިލިޓީއަކީ ކޮވިޑް-19ގެ އެންމެ ނުރައްކާ ބޮޑު ބަލި މީހުންނަށް ފަރުވާ ދިނުމަށް ހަދަމުން އަންނަ ތަނެކެވެ. މި ތަނުގައި މަސައްކަތް ކުރާ ދެ ބިދޭސީއަކު ކޮވިޑް-19 އަށް ޕޮޒިޓިވްވެފައިވާކަން ނެޝަނަލް އިމެޖެންސީ އޮޕަރޭޝަން ސެންޓަރ (އެންއީއޯސީ) އިން ވަނީ ޔަގީންކޮށްދީފައެވެ.
އެނގިފައިވާ ގޮތުގައި އެތަނުގައި ކޮވިޑް-19 އަށް ޕޮޒިޓިވްވެފައިވަނީ އެތަނުގައި މަސައްކަތް ކުރާ ރަޝީދު ކާޕެންޓްރީގެ ދެ ބިދޭސީއެކެވެ.
މި ދެމީހުން ބައްޔަށް ޕޮޒިޓިވްވުމާއި ގުޅިގެން ގިނަ އަދަދެއްގެ ބަޔެއްގެ ސާމްޕަލް ވަނީ ނަގާފައެވެ. އޭގެ ތެރޭގައި ގިނަ އަދަދެއްގެ ސިފައިންނާއި، ފެނަކައިގެ މުވައްޒަފުން ހިމެނެއެވެ.
ކޮވިޑް-19 އަށް އިއްޔެ އެކަނިވެސް 73 މީހަކު ވަނީ ޕޮޒިޓިވްވެފައެވެ. ރާއްޖެއިން މިހާތަނަށް މި ބައްޔަށް 214 މީހަކު ވަނީ ޕޮޒިޓިވްވެފައެވެ.