ކަރަންޓީނަށް ދާން ދެކޮޅު ހެދި މީހަކު، ކޯޓް އަމުރެއްގެ ދަށުން އަނެއްކާވެސް ކަރަންޓީނަށް ގެންގޮސްފިއެވެ.
އެ އަމުރު ސިވިލް ކޯޓުން ނެރުނީ ރޭ ދަންވަރުގެ ވަގުތެއްގައެވެ. އެމީހަކީ ބިދޭސީއެވެ. ރާއްޖޭގައި އުޅޭ އޮސްޓްރިއާ އަށް ނިސްބަތްވާ އެމީހާ ކަރަންޓީނަށް ގެންދިއުމަށާއި ކަރަންޓީން ފެސިލިޓީއެއްގައި ބަންދު ކުރުމަށް ކަމާބެހޭ ފަރާތްތަކަށާއި ފުލުހުންގެ މައްޗަށް ސިވިލް ކޯޓުން ވަނީ ނެރެފައެވެ. އިއްޔެ ރޭ ވެސް މިފަދަ އަމުރެއް ވަނީ ނެރެފައެވެ. ނަމަވެސް މީގެކުރިން މިފަދައިން އަމުރެއް ނެރެފައި ވަނީ ހުސް ދިވެހިންގެ މައްޗަށެވެ. މިއީ ބިދޭސީއެއްގެ މައްޗަށް މިފަދަ އަމުރެއް ނެރުނު ފުރަތަމަ ފަހަރެވެ.
ގައިން ގަޔަށް އަރާ ނުރައްކާތެރި ބަލި މީހުން ކަރަންޓީން ކުރުމާއި ރައްކާތެރިކަމުގެ ފިޔަވަޅުގެ ގޮތުން އެ މީހުންނަށް އަންގާ އެންގުންތަކަށް ތަބާނުވާ ނަމަ، އެކަން ކުރުމުގެ ކޯޓު އަމުރު ނެރުމުގެ އުސޫލު ސިވިލް ކޯޓުން އާއްމު ކުރީ މިދިޔަ މަހުގެ 12ވަނަ ދުވަހުއެވެ.
އާންމު ސިއްހަތު ރައްކާތެރި ކުރުމުގެ ގާނޫނު ބުނާގޮތުން، ގައިން ގަޔަށް އަރާ ބައްޔެއް ހުންނަ މީހުންނާއި އެފަދަ ބައްޔެއް ހުރެދާނެ ކަމަށް ބެލެވޭ މީހުން ވަކި ކަމެއް ނުކުރަން ނުވަތަ ވަކި ކަމެއް ކުރަން އެންގިދާނެ އެވެ. އޭގެ ތެރޭގައި ކަރަންޓީން ކުރުން ވެސް ހިމެނެއެވެ. އަދި އެކަމަށް އެ މީހަކު ދެކޮޅު ހަދާ ނަމަ، އެކަން ތަންފީޒު ކުރުމުގެ އަމުރަކަށް އެދި ސިވިލް ކޯޓަށް ހުށަހެޅިދާނެ ކަމަށް ވެސް އެ ގާނޫނުގައިވެއެވެ.