މާލެއިން ކޮވިޑް19 ފެނިފައިވުމާއި ގުޅިގެން މާލެ ސަރަހައްދުގެ ލޮކްޑައުން މުއްދަތު އިތުރު 14 ދުވަހަށް އިތުރުކޮށްފިއެވެ.
ޑިރެކްޓާ ޖެނަރަލް އޮފް ޕަބްލިކް ހެލްތު ނެރުއްވާފައިވާ އެންގުމެއްގައި ބުނެފައިވަނީ މި މަހުގެ 17 ވަނަ ދުވަހު މާލެ ސަރަހައްދު ލޮކްޑައުުން ކުރުމަށް އެންގި އެންގުމުގެ މުއްދަތު އިތުރު 14 ދުވަހަށް އިތުރު ކޮށް އެކަން އަންގައި އިއުލާން ކުރާ ކަމަށެވެ.
މާލެ ސަރަހައްދު ލޮކްޑައުން ކުރުމަށް ނިންމީ މި މަހުގެ 15 ވަނަ ދުވަހު މާލެއިން ކޮވިޑަށް ޕޮޒިޓިވް ވެފައިވާ މީހަކު ފެނުމާ ގުޅިގެންނެވެ. އެމީހާ އަށްފަހު މާލެއިން ގިނަ އަދަދެއްގެ ބަޔަކު މި ބައްޔަށް ޕޮޒިިވްވަމުން އަންނައިރު، މިހާތަނަށް ރާއްޖެއިން މި ބައްޔަށް ޖުމްލަ 256 މީހަކު ވަނީ ޕޮޒިޓިވް ވެފައެވެ.
މާލޭގެ އިތުރުން އުތުރުގެ ބައެއް ރަށްތަކުން ވެސް މި ބައްޔަށް ބަޔަކު ވަނީ ޕޮޒިޓިވް ވެފައެވެ. އޭގެތެރޭގައި ހިމެނެނީ މި ބައްޔަށް ޕޮޒިޓިވް ވެފައިވާ މާލެ ދަތުރުކުރާ ށ.ނަރުދޫގެ "އަމާޒު" ބޯޓުގެ ކެޕްޓަން އާއި ސީދާ ގޮތުން ދިމާވި ނަރުދޫގެ 8 މީހަކާއި އަމާޒު ބޯޓުގައި ދަތުރުކުރި އެ އަތޮޅު މިލަންދޫގެ މީހެކެވެ.
އަދި މީގެކުރިން ހއ.އުލިގަމުން ވެސް މި ބައްޔަށް މީހަކު ޕޮޒިޓިވް ވެފައިވެއެވެ. އެއީ ވެސް މާލެ ދަތުރުކުރާ ބޯޓެއްގައި އެނބުރި ރަށަށް ދިޔަ މީހެކެވެ.