ކޮވިޑް19 އަށް ރާއްޖެއިން ޕޮޒިޓިވްވި މީހުންގެ ތެރެއިން ދަރުމަވަންތަ ހޮސްޕިޓަލްގައި އެޑްމިޓްކުރި ޢުމުރުން 80 އަހަރުގެ މީހާގެ ޙާލު ސީރިއަސްވެ ވެންޓިލޭޓަރުގެ އެހީގައި ފަރުވާދެމުން އަންނަ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
މިކަމާއި ގުޅިގެން އިތުރު އެއްވެސް ތަފްސީލެއް ހާމައެއް ނުކުރެއެވެ. އެމީހާއަކީ ރާއްޖެއިން ކޮވިޑް19 އަށް ޕޮޒިޓިވްވި މީހުންގެ ތެރެއިން ކޭސް ނަންބަރު 81 އެވެ. 80 އަހަރުގެ އެމީހާ އަކީ ދިވެއްސެކެވެ. އޭނާ އަކީ ސްޓްރޯކެއް ޖެހުމުގެ ސަބަބުން ދެ އަހަރު ވަންދެން އެނދުމަތިވެފައިވާ މީހެކެވެ.
މީގެކުރިން އެޗްޕީއޭ އިން ވަނީ އޭނާއަކީ ހަކުރު ބައްޔާއި، ކްލޮސްޓްރޯލް އަދި ލޭމައްޗަށް ދިއުންފަދަ ބަލިތަކަށް ފަރުވާ ހޯދަމުން އަންނަ މީހެއް ކަމަށާއި، އަދި މީގެކުރިން ނިއުމޯނިއާ ޖެހިގެން އޭނާ އެތައް ފަހަރަކު ހޮސްޕިޓަލުގައި އެޑްމިޓްކޮށްފައިވާ މީހެއް ކަމަށް ބުނެފައެވެ.
80 އަހަރުގެ މީހާ ބައްޔަށް ހުށަހެޅިގެން ދިއުމަކީ މި ބަލި ފެތުރިގެން ގޮސްފައިވާ މިންވަރު ދައްކުވައިދޭ ކަމެއް ކަމަށް އެޗްޕީއޭ އިން މީގެކުރިން ބުނެފައިވެއެވެ.