ދައުލަތުން ނަގާފައިވާ ލޯނުތައް ދެއްކުމަށް މިދިޔަ އަހަރު ހޭދަކުރި މިންވަރަށް ވުރެ އިތުރަށް މިއަހަރު ދައުލަތުން ހޭދަކޮށްފިއެވެ.
ފިނޭންސް މިނިސްޓްރީން އާއްމު ކޮށްފައިވާ ތަފާސް ހިސާބުތައް ދައްކާ ގޮތުގައި މި މަހުގެ 23ވަނަ ދުވަހާއި ހަމައަށް ދައުލަތުން ވަނީ 448.5 މިލިއަން ރުފިޔާ ދައުލަތުން ނަގާފައިވާ ލޯނުތަކަށް ދައްކާފައެވެ. އެއީ މިދިޔަ އަހަރަށް ވުރެ 30.2 މިލިއަން ރުފިޔާ އިތުރު އަދަދެކެވެ. މިދިޔަ އަހަރު ލޯނުތައް ދެއްކުމަށް ދައުލަތުން ހޭދަކޮށްފައިވަނީ 418.3 މިލިއަން ރުފިޔާއެވެ.
މިއަހަރަށް ކަނޑައަޅާފައިވާ ބަޖެޓުގައި ލޯނުތައް ދެއްކުމަށް 1.8 ބިލިއަން ރުފިޔާ ކަނޑައަޅާފައިވެއެވެ. ނަމަވެސް އެއީ މިހާރުގެ ހާލަތުން ކަނޑައެޅިދާނެ އަދަދެއްކަމާއި މެދު ވަނީ ސުވާލު އުފެދިފައެވެ.
ކޮވިޑް19 ގެ ސަބަބުން ރާއްޖޭގެ އިގްތިސޯދު ވަނީ ވަރަށް ބޮޑު އަނދަވަޅަކަށް ވެއްޓިފައެވެ. ދައުލަތުން ފާސްކުރި ބަޖެޓުގައި އާމްދަނީގެ ގޮތުގައި 30 ބިލިއަން ލިބޭނެ ކަމަށް ލަފާކުރި ނަމަވެސް މިހާރު އަންދާޒާ ކުރަނީ 15 ބިލިއަން ލިބޭނެ ކަމަށެވެ. ޖެނުއަރީ މަހުން ފެށިގެން މި މަހުގެ 23ވަނަ ދުވަހާއި ހަމައަށް އާމްދަނީގެ ގޮތުގައި ލިބިފައިވަނީ 5.3 ބިލިއަން ރުފިޔާއެވެ.