ކޯވިޑް-19 ޖެހިފައިވާ މީހުންގެ ފަރުވާއަށް ރެމްޑެސިވިރް ނަމަކަށް ކިޔާ އާ ބޭހެއް ބޭނުން ކުރުމުގެ ހުއްދަ އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) އިން ދީފިއެވެ.
މިބޭހަކީ ކޯވިޑް-19 ޖެހޭ މީހުން ބަލިން ރަނގަޅުވުމަށް ނަގާ މުއްދަތު 15 ދުވަހުން 11 ދުވަހަށް މަދު ކޮށްލާ ބޭހެކެވެ.
އެފްޑީއޭއިން ހުކުރު ދުވަހު ނެރުނު ބަޔާނެއްގައި އެފްޑީއޭގެ އެޑްމިނިސްޓްރޭޝަނުގެ ކޮމިޝަނަރ ސްޓެފެން ހާން ބުނެފައިވަނީ، މިއީ އެމެރިކާގައި ކޯވިޑް-19 އަށް ބޭނުން ކުރުމަށް ހުއްދަ ދެވޭ ތެރަޕީ ބޭސް ކަމުގައެވެ.
"މިއީ ކޯވިޑް-19 ޖެހިފައިވާ މީހުން ބަލިން ރަނގަޅު ވުމަށް ނަގާ މުއްދަތު ވަރަށް ބޮޑުތަނުން ކުޑަ ކޮށްދީފައިވާ، ވަރަށް ބޮޑު ކްލިނިކަލް ކުރިއެރުމެއް، އަދި މިއީ ކޯވިޑް-19 އަށް ބޭނުން ކުރުމަށް ހުއްދަ ދެވޭ ފުރަތަމަ ތެރަޕީ ބޭސް" ހާން ބުންޏެވެ.
އެގޮތުން ރެމްޑެސިވިރް ބޭނުން ކުރުމަށް އެފްޑީއޭއިން ދީފައިވާ ހުއްދައަކީ އެމަރޖެންސީ ނުވަތަ ކުއްލި ހާލަތުގެ ހުއްދައެކެވެ. އަދި މިގޮތަށް ދެވޭ ހުއްދަ އަކީ ފުރިހަމަ އެފްޑީއޭ ހުއްދަ އަކަށްވުރެ ދަށް މިންގަނޑަކުން ދެވޭ ހުއްދައަކަށްވާއިރު، މިބޭސް ބޭނުން ކުރުމަށް މިހާރު ހުއްދަ ދެވިފައިވަނީ، ބޭހުން ކުރާ ފައިދާ، އެއިން ކުރިމަތި ކުރުވަފާނެ ގެއްލުމަށްވުރެ ކުޑަ ކަން ދެނެގަނެވިފައިވާތީއެވެ.
ހުއްދަ ދިން ބަޔާނުގައި އެފްޑީއޭގެ ޗީފް ސައިންޓިސްޓް ޑެނިސް ހިންޓަން ލިޔެފައިވަނީ، "ކޯވިޑް-19އަށް ބޭސްކުރުމަށް ކުއްލި ހާލަތުގައި ބޭނުން ކުރުމަށް ރެމްޑެސިވިރް ނޫން އެއްވެސް އެކަށީގެންވާ، ހުއްދަ ދެވިފައިވާ، އަދި ލިބެން ހުރި ބޭހެއް ނެތް" ކަމަށެވެ.
ކުއްލި ހާލަތުގައި މިބޭސް ބޭނުން ކުރުމެ ހުއްދަ ދެވުނު ނަމަވެސް، މިބޭސް ދެވޭނީ ހަމަ އެކަނި ޝައްކު ކުރެވޭ، ނުވަތަ ޓެސްޓުން ޔަޤީން ކުރެވިފައިވާ ކޯވިޑް-19 ގެ ހާލު ދެރަ ބަލިމީހުންގެ ތެރެއިން އޮކްސިޖަން ލެވެލް ދަށް، ނުވަތަ އޮކްސިޖަން ތެރަޕީ ބޭނުންވާ، ވެންޓިލޭޓަރ ބޭނުންވާ، ނުވަތަ އެނޫންވެސް ނޭވާލުމަށް އެހީ ބޭނުންވާ ބަލިމީހުންނަށް ބޭސްކުރުމަށެވެ.
ރެމްޑެސިވިރް ބޭނުން ކުރުމުން ކޮށްފާނެ ނޭދެވޭ އަސަރުތަކުގެ ތެރޭގައި ފުރަމޭގެ ސެލްތަކަށް ގެއްލުން ވުން، ނުވަތަ ފުރަމޭ ދުޅަވުމުގެ ނިޝާނެއް ކަމަށްވާ ފުރަމޭގެ އެންޒައިމް ގިނަވުން، އަދި އިންފިއުޜަން އާއި ގުޅުން ހުރި ކަންކަން ކަމަށްވާ ލޭގެ ޕްރެޝަރު ދަށްވުން، މޭނުބައި ކުރުން، އަދި ދާހިއްލުމާއި ހީކެރުވުން ހިމެނޭކަމަށް އެފްޑީއޭއިން ވަނީ ހާމަކޮށްފައެވެ.
ރެމްޑެސިވިރް އާއި ބެހޭގޮތުން ވާހަކަ ދައްކަވަމުން އެމެެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވަނީ މިއީ "ވަރަށް އުންމީދުން ފުރިގެންވާ ހާލަތެއް" ކަމުގައެވެ. އަދި އެފްޑީއޭގެ ސިޓީގައި ބުނެފައިވަނީ، ހުއްދަ ދެވިފައިވާ "ސަބަބުތަކާއި މިންގަނޑުތަކާއި" އެއްގޮތަށް ބޭސް ބޭނުން ކުރެވޭކަން ކަޝަވަރު ކުރުމުގެ ގޮތުން މިބޭސް ދޫކުރަން ހަމަޖެހިފައިވަނީ އެޤައުމުގެ ފެޑެރަލް ސަރުކާރުންކަމަށެވެ.
މިބޭސް އުފައްދާފައިވާ ކުންފުނި، ޖިލިއެޑް ސައެންސެސް އިން ބުނެފައިވަނީ، މި ބޭސް ބޭނުން ކުރަން ޖެހޭނީ އައިވީ އިން ކަމަށާއި، މިބޭހުގެ އެންމެ ރަނގަޅު ޑޯޒް ސީދާ ކަނޑައެޅިފައި ނުވި ނަމަވެސް، ވެންޓިލޭޓަރުގައި ތިބޭ ބަލިމީހުންނަށް 10 ދުވަސް އަދި އެނޫން ބަލި މީހުންނަށް 5 ދުވަހުގެ މުއްދަތަކަށް ކަމަށެވެ.
ޖިލިއެޑް އިން ވަނީ މިހާރު އުފެއްދިފައިވާ ހުރިހާ ރެމްޑެސިވިރްގެ ސަޕްލައި އެއްކޮށް ކޯވިޑް-19 ޖެހިފައިވާ މީހުންނަށް ބޭސްކުރުމަށް ހަދިޔާކޮށްފައެވެ. މިއީ ގާތް ގަނޑަކަށް 140،000 މީހުންނަށް ފަރުވާ ކުރެވޭނެހާ ބޭހެވެ. އަދި އެކުންފުނިން ބުނާގޮތުގައި ބޭނުން ޖެހިއްޖެނަމަ، އޮކްޓޯބަރާއި ހަމައަށް 500،000 މީހުންނަށް ފަރުވާ ކުރެވޭނެހާ ބޭސް އުފެއްދޭނެ ކަމަށާއި، އެދަދު ޑިސެމްބަރު 2020 ގައި އެއް މިލިއަނަށް ޖައްސައި، 2021 ގައި އެ ސަޕްލައި އެތައް މިލިއަނަކަށް އިތުރު ކުރެވޭނެކަމަށެވެ.
މިހަފްތާގެ ކުރީކޮޅު، އެމެރިކާގެ ސަރުކާރުން ޚަރަދުކޮށްގެން ހިންގި ދިރާސާއަކުންވެސް ދެއްކިގޮތުގައި ރެމްޑެސިވިރް ބޭނުން ކުރި ބަލިމީހުން ރަނގަޅުވާ މުއްދަތު ވަނީ 15 ދުވަހުން 11 ދުވަހަށް ކުރު ކުރެވިފައެވެ. މިއީ އާދައިގެ ރޯގާތަކަށް ބޭނުން ކުރާ ޓެމިފްލޫ ފަދަ ބޭސްތަކުންވެސް ލިބޭ ފަސޭހައެވެ.