ކޮވިޑް19 އާއި ދެކޮޅަށް ރާއްޖެއިން ކުރަމުން ގެންދާ މަސައްކަތްތަކަށް އެހީވުމުގެ ގޮތުން މަޝްހޫރު ވިޔަފާރި ކުންފުނި، "އަލީބާބާ"ގެ ބާނީ، ޖެކް މާ، ރާއްޖެ އަށް ފޯރުކޮށްދޭ އެހީތައް ގެނައުމުގެ މަސައްކަތް ފަށައިފިއެވެ.
ރާއްޖޭގައި ހުންނަވާ ޗައިނާގެ ސަފީރު ކުރެއްވި ޓްވީޓެއްގައި މިއަދު ވިދާޅުވީ މިދިޔަ މަހުގެ 21ވަނަ ދުވަހު ޖެކްމާ ރާއްޖެއަށް އެހީވުމަށް ހާމަ ކުރެއްވި ކަމަށާއި އެތަކެތި ރާއްޖެ ގެނައުމުގެ މަސައްކަތް ފަށާފައިވާ ކަމަށެވެ. އަދި ވިދާޅުވީ އެ އެތަކެތި ރާއްޖެ އައުން ލަސްވަނީ ދަނޑިވަޅުގެ ގޮތުން އެތަކެތި ގެނައުމަށް އިތުރު މަސައްކަތްތަކެއް ކުރަން ޖެހޭތީ ކަމަށެވެ.
The flight on the way.
Special time requires extra effort.
Ever since the announcement of @JackMa, the Embassy has stepped in to coordinate. Then 6 more enterprises, local Gov. of Guangxi(sister city of Male), MFA of China joined the donation.
Good things need patience. https://t.co/mQ4ugTUS3t
— Ambassador Wang Lixin (@China_Amb_Mdv) May 2, 2020
ޖެކްމާގެ އިތުރުން ވެސް ޗައިނާގެ ފޮރިން މިނިސްޓްރީއާ އެގައުމުގެ އިތުރު 6 ކުންފުންޏަކުން ރާއްޖެއަށް އެހީވުމުގެ މަސައްކަތް އަންނަނީ ކުރަމުން ކަމަށް ސަފީރު ވިދާޅުވިއެވެ. ނަމަވެސް އެކަމުގެ ތަފްސީލެއް ހާމައެއް ނުކުރައްވައެވެ.
މިދިޔަ މާޗު މަހުގެ 21ވަނަ ދުވަހު ޖެކްމާ ކުރެއްވި ޓްވީޓެއްގައި ވިދާޅުވީ ކޮވިޑް19 އިން ރައްކާތެރިވުމުގެ ގޮތުން ބޭނުންވާ ސާމާން ސަޕްލައިކޮށްދޭނެ ކަމަށެވެ. އެގޮތުން 1.8 މިލިއަން މާސްކާއި، 210000 ޓެސްޓު ކިޓާއި، 36000 ސޫޓުގެ އިތުރުން ވެންޓިލޭޓަރާއި ތާމޯމީޓަރު ސަޕްލައި ކޮށްދިނުމަށް ނިންމާފައިވާ ކަމަށެވެ.
މިތަކެތި ސަޕްލައި ކުރުމަށް ހަމަޖެހިފައިވަނީ ރާއްޖޭގެ އިތުރުން އަވައްޓެރި ލަންކާ އަދި އަފްޢާނިސްތާން، ބަންގުލަދޭޝް، ލާއޯސް، ކެމްބޯޑިއާ، މޮންގޯލިއާ، މިޔަންމާ، އަދި ޕާކިސްތާނަށެވެ.
ޖެކްމާ ވަނީ ކޮވިޑް-19 އަށް ވެކްސިން ހޯދުމަށް ކުރަމުން އަންނަ މަސައްކަތަށްވެސް 14 މިލިއަން ޑޮލަރު ހަދިޔާކޮށްފައެވެ. އަދި ޔޫރަޕްގެ ގައުމުތަކަށްވެސް އެމަޖެންސީ ތަކެތި ވަނީ ފޯރުކޮށްދީފައެވެ.