ރާއްޖެއިން ކޮވިޑް19 ފެނި ކޮމިއުނިޓީ ސްޕްރެޑަކަށް ގޮސްފައިވާ މި ދަނޑިވަޅުގައި މި ބަލި ރާއްޖެއިން ކޮންޓްރޯލް ކުރުމަށް އޮތް އެންމެ ބޮޑު ގޮންޖެހުމަކީ ރާއްޖޭގައި ދިރިއުޅޭ ބިދޭސީން ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
އެކި ސަރަހައްދުތަކުގައި ގާއިމް ކުރާ ކަރަންޓީން ފެސިލިޓީތަކަށް ޒިޔާރަތް ކުރައްވާ މިނިސްޓަރު އިމްރާން ކުރެއްވި ޓްވީޓެއްގައި ވިދާޅުވީ މިކަމުގައި އޮތް އެންމެ ބޮޑު ގޮންޖެހުމަކީ ބިދޭސީން ކަމަށެވެ. އަދި އެމީހުން ދިރިއުޅެމުން އަންނަ ދަތި ތަންތަނުން ނެރެ ރައްކާތެރި ތަންތަނަށް ގެންދިއުމަކީ ބާރު ބޮޑު އެހެން ނަމަވެސް އިސްކަން ދީގެން ކުރަމުން ގެންދާ މަސައްކަތެއް ކަމަށް މިނިސްޓަރު އިމްރާން ވިދާޅުވިއެވެ.
#COVID__19 control kurumah oyi enme bodu eh gonjehumakee zamaanussure halleh nulibifaioiy bidheyseenge massala.
emeehun dhiriulhey dhathi thanthanun nere rakkaatheri thanthanah gendhiumakee sarukaarah burabodu ehenas iskameh dheegen kuramun dhaa muhinmu eh masahkaiy. pic.twitter.com/ba61z4vB8x— Imran Abdulla (@ShimranAb) May 2, 2020
މިނިސްޓަރު އިމްރާން މިފަދައިން ވިދާޅުވެފައިވާއިރު ކޮވިޑް19 ގެ ނުރައްކަލަށް ހުށައެޅިފައިވާ ހުރިހާ ބިދޭސީން އެންއީއޯސީއިން ކަނޑައަޅާ ތަނެއްގައި ކަރަންޓީން ކުރުމަށް ޑިރެކްޓަރު ޖެނެރަލް އޮފް ޕަބްލިކް ހެލްތް އަންގާފައި ވަނިކޮށެވެ.
ޑިރެކްޓަރު ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރު ސޮއިކުރައްވާ ނެރުއްވާފައިވާ މި އެންގުމުގައި ވިދާޅުވީ މި ބަލި އެންމެ ބޮޑަށް ފެތުރެމުންދަނީ މާލޭގައި އުޅޭ ބިދޭސީންގެ މެދުގައި ކަމަށާއި، އަދި ބިދޭސީންގެ މެދުގައި މި ބަލި ފެތުރުމުގެ ފުރުސަތު ބޮޮޑު ކަމަށް ފެންނަ ކަމަށެވެ.
އެހެންކަމުން އެ އެންގުމުގައި ވަނީ ބިދޭސީންނާއި ގުޅޭގޮތުން މިވަގުތުން މިވަގުތަށް އަޅަންޖެހޭ ފިޔަވަޅުތައް ހާމަކޮށްފައެވެ.
އެގޮތުން މާލެ ސަރަހައްދުގައި އުޅޭ ބިދޭސީންގެ ތެރެއިން ވަޒީފާ އަދާކުރާ ވަކި ތަނެއް ނެތް އަދި ދިރިއުޅޭނެ ވަކި ތަނެއް ކަނޑައެޅިފައިނުވާ ބިދޭސީ މަސައްކަތްތެރިން އެކަހެރިކޮށް މޮނިޓަރު ނުކުރާ ނަމަ އެމީހުންގެ މެެދުގައި ކޮވިޑް ފެތުރުމުގެ ފުރުސަތު ވަރަަށް ބޮޑު ކަމަށް ފެންނާނީ އެންއީއޯސީން ކަނޑައަޅާ ތަނެއްގައި ކަރަންޓީން ކުރަން ވަނީ އަންގާފައެވެ.